Það var allt annað íslenskt landslið sem mætti til leiks í dag gegn Belgum en það sem við sáum í gær. Það var greinilegt að strákarnir ætluðu að sanna fyrir sjálfum sér og öðrum kannski líka að þeir væru betri en það sem þeir sýndu gegn Eistum.

Vörn liðsins var frábær og börðust menn fram á síðustu sekúndu og gaman var að sjá þegar strákarnir hentu sér í gólfið á eftir öllum boltum og stundum fleiri en einn og fleiri en tveir í sama boltann.

Staðan eftir fyrsta leikhluta var 21:23 Belgum í vil. Ísland hafði betur í 2. leikhluta og vannst hann 20:18 og staðan í hálfleik því jöfn 41:41

Leikmenn íslenska liðsins voru vel minnugir þess hvað gerðist gegn Svartfjallalandi þegar liðið leiddi í hálfleik þar sem liðið missti alveg dampinn og andstæðingar gengu á lagið og unnu 3. leikhlutann mjög stórt.

Liðið mætti gríðarlega tilbúið til leiks og náði strax undirtökunum, mestur varð munurinn 13 stig á liðunum en Belgar náðu að minnka það niður. Þriðji hlutinn vannst 24:20

Í síðasta leikhlutanum skellti íslenska liðið algerlega í lás í vörninni og var sóknarleikur Belgana á tíðum vandræðalegur. Liðið var að leika mjg hreyfanlega svæðisvörn.

4. leikhlutinn endaði 12:7 og öruggur 77:68 sigur í höfn.

Hægt er að skoða allt um leikinn og stöðuna í riðlunum hér

Allt liðið var að berjast og allir að skila sínu. Það er þó ekki hægt annað en að minnast á stórkostlegan leik Hauks Pálssonar sem skoraði 41 stig og tók 12 fráköst.