Ísland mætir Finnlandi í þriðja leik sínum á Norðurlandamótinu í Gentofte klukkan 13.00 að íslenskum tíma. Íslenska kvennalandsliðið hefur aldrei náð að vinna Finna en landsliðsþjálfarinn Ágúst Björgvinsson segir að stelpurnar ætli að breyta því í dag.

"Ég tel það að okkar möguleikar á móti Finnlandi hafi aldrei verið meiri en einmitt núna. Finnar eru að spila sinn síðasta leik í þessu móti og eru búnir að spila fjóra daga í röð. Þeir spiluðu líka þrjá æfingaleiki við Litháen fyrir þetta mót þannig að þetta lið er búið að spila marga leiki á stuttum tíma. Þær eru fáliðaðar og í raun dauðuppgefnar. Ef við komum inn með rétt hugarfar og með sömu baráttu og í leiknum á móti Noregi í gær þá er ég vissum að við náum hagstæðum úrslitum í leiknum," sagði Ágúst.

Ágúst segir að liðsandinn og stemmningin sem var í leiknum á móti Noregi geti skilað íslenska liðinu langt gegn Finnum í dag. "Við ætlum að taka með þessa frábæru stemmningu sem var í hópnum í Noregsleiknum. Stelpurnar voru að hafa gaman að þessu, þær voru að leggja sig fram og það var bara virkilega góður andi í liðinu. Það er klárlega það sem við þurfum að taka með í næsta leik og í næstu leiki," sagði Ágúst að lokum.