Íslenska kvennalandsliðið tapaði með sjö stiga mun, 74-81, í öðrum leik sínum á Norðurlandamótinu í Gentofe í kvöld. Íslensku stelpurnar sýndu allt annan og miklu betri leik en gegn Svíum í gær en Norðmenn, sem hafa unnið tvo fyrstu leiki sína, voru sterkari á lokasprettinum. Ísland mætir Finnum á mótinu í dag.

Íslenska liðinu gekk ekki vel á upphafsmínútum leiksins og lenti strax sjö stigum undir, 1-8. Norðmenn héldu frumkvæðinu fram eftir fyrsta leikhlutann og komust í 7-15 eftir tæplega sex mínútna leik. Þá tóku við frábærar fjórar mínútur sem íslenska liðið vann 13-2 og komst 20-17 yfir. Sigrún Ámundadóttir fór mikinn á þessum tíma og skoraði þá sex stig. Norðmenn áttu hinsvegar lokaorðið og komust yfir í 20-21 eftir að hafa stolið boltanum af íslenska liðinu og skorað úr hraðaupphlaupi.

Ísland skoraði fyrstu tvö stig annars leikhluta en þá tók við mjög slæmur kafli þar sem stelpurnar fengu á sig níu norsk stig í röð. Eftir það voru norsku stelpurnar aftur komnar með frumkvæðið og héldu því út hálfleikinn. Norðmenn leiddu með fimm stigum í hálfleik, 34-39. Helena Sverrisdóttir skoraði 7 stig í leikhlutanum en það vantaði framlög frá fleirum. Það breyttist hinsvegar allt eftir hálfleiksræðuna hjá Ágústi Björgvinssyni þjálfara.

Íslensku stelpurnar komu mjög grimmar inn í seinni hálfleikinn og skoruðu sjö fyrstu stig í þriðja leikhlutanum. Signý Hermannsdóttir, fyrirliði liðsins, skoraði fimm af þessum sjö stigum og íslenska liðið komst 41-39 yfir. Íslenska liðið spilaði af miklum krafti á þessum tíma leiksins en það kostaði liðið margar villur og Norðmenn skoruð 10 af 15 stigum sínum í hálfleiknum af vítalínunni.

Þessi góða vítanýting norska liðsins hjálpaði liðinu til að komast sjö stigum yfir en íslenska liðið átti góðan endakafla og kom sér aftur inn í leikinn. Tveir þristar frá Petrúnellu Skúladóttur og tveggja stiga karfa frá Maríu Ben Erlingsdóttir voru þá lykillinn að baki 8-1 kafla en með honum jafnaði íslenska liðið leikinn í 54-54 fyrir lok þriðja leikhlutans.

Fjórði og síðasti leikhlutinn var æsispennandi og jafn fram í hann miðjan en þá gáfu íslensku stelpurnar eftir og eftir sex norsk stig í röð var á brattan að sækja fyrir íslenska liðið. Norðmenn komust með því 65-73 yfir í leiknum og þann mun náðu íslensku stelpurnar aldrei að brúa. Íslenska liðið hitti mjög vel á lokasprettinum (9 af 15 skotum, 60%) en átta tapaðir boltar voru dýrkeyptir.

Helena Sverrisdóttir tók mikið af skarið í sókninni og var með 18 stig og 9 stoðsendingar, Petrúnella Skúladóttir átti frábæran seinni hálfleik þar sem hún raðaði niður þriggja stiga körfum og María Ben Erlingsdóttir kom sterk inn af bekknum. Þá átti Sigrún Ámundadóttir mjög góðan leik í fyrsta leik sínum í byrjunarliðinu. Allt íslenska liðið á líka heiður skilinn fyrir mikla baráttu og leikgleði en því miður vantaði bara herslumuninn að landa fyrsta sigrinum á Norðurlandamótinu.

Næsti leikur er á móti Finnum og hefst hann klukkan 15.00 á morgun eða klukkan 13.00 að íslenskum tíma. Finnar hafa unnið 1 af 3 leikjum sínum á mótinu en þetta er lokaleikur liðsins á Norðurlandamótinu í ár.

Ísland-Noregur 74-81 (20-21, 34-39, 54-54)
Helena Sverrisdóttir 18 stig (9 stoðsendingar, 8 fráköst)
Petrúnella Skúladóttir 13 stig (hitti úr 5 af 7 skotum þar af 3 af 4 3ja stiga, 18 mínútur)
María Ben Erlingsdóttir 10 stig
Signý Hermannsdóttir 9 stig (8 fráköst, 4 varin skot)
Sigrún Ámundadóttir 8 stig (4 fráköst, 2 stolnir)
Pálína Gunnlaugsdóttir 7 stig (3 stoðsendingar)
Kristrún Sigurjónsdóttir 5 stig
Hildur Sigurðardóttir 2 stig (4 fráköst, 4 stoðsendingar)
Ragna Margrét Brynjarsdóttir 2 stig