Í kvöld verða 2 leikir í Iceland Express deild karla og einn leikur í Iceland Express deild kvenna. Einnig verður leikið í 1. deild karla og kvenna.

Það verður stórleikur í Stykkishólmi í kvöld þegar Snæfell og Grindavík mætast. Grindavík er í þriðja sæti deildarinnar og eiga enn möguleika á því að hækka sig í töflunni. Snæfell er í fimmta sætinu og er að reyna að ná fjórða sætinu sem tryggir heimavallarréttindi í fyrstu umferð úrslitakeppninnar. Grindavík mun tefla fram nýjum leikmanni í kvöld, Jamaal Williams, og það verður fróðlegt að sjá hvernig Grindvíkingum mun ganga gegn bikarmeisturunum.

Á Akureyri mætast Þór Akureyri og Fjölnir. Þór er í mikilli baráttu við Tindastól og Stjörnuna um að komast í úrslitakeppnina en Fjölnismenn eru fastir á botni deildarinnar með Hamri. Það er þó ljóst að þeir geta unnið flest lið á góðum degi.

Í Iceland Express deild kvenna mætast Keflavík og Hamar. Keflavík hefur þegar tryggt sér deildarmeistaratitilinn og mun fá bikarinn afhentann í kvöld.

Í Smáranum í Kópavogi mætast Breiðablik og Þróttur Vogum í 1. deild karla. Breiðablik mun fá deildarmeistarbikarinn afhentann eftir leikinn í kvöld.

Þessir leikir hefjast allir klukkan 19:15.

Klukkan 20:00 mætast Valur og Höttur í 1. deild karla. Valsmenn eru að reyna að ná FSu í 2. sæti deildarinnar en Höttur er enn í töluverðri fallhættu.

Í 1. deild kvenna verða tveir leikir. Haukar B og Breiðablik klukkan 20:00 að Ásvöllum í Hafnarfirði. Leikur Þórs Akureyri og Ármanns hefst svo klukkan 21:00 í Síðuskóla á Akureyri.