Bikarúrslit yngri flokka verða um helgina í Iðu á Selfossi. Við fengum Benedikt Guðmundsson til að spá í spilin fyrir leiki helgarinnar.

Laugardagur 1. mars:

10:00, úrslit í 9. flokki kvenna: Hrunamenn - Keflavík.

Það er alltaf jafn gaman að sjá lið frá Hrunamönnum í úrslitum og er alveg ótrúlegt hvað þetta félag hefur átt marga kvennaflokka framarlega undanfarin ár og skilið mun "stærri" félög fyrir aftan sig. Reyndar er líklegt að Hrunamenn verði að láta sér nægja að hafa komist í úrslitaleikinn í þetta skiptið því andstæðingar þeirra eru hið fyrnasterka lið Keflavíkur sem er nánast ósigrandi. Yfirburðir Keflavíkur í þessum aldursflokki eru þó nokkrir enda frábært starf verið unnið með þessar stelpur lengi. María Ben og Árný eiga eftir að fara mikinn í þessum leik og vera fremstar á meðal jafningja.

12:00, úrslit í 10. flokki karla: Njarðvík - Hamar/Þór

Njarðvík kom svakalega á óvart síðasta vetur og varð Íslandsmeistari og sýndi það með sigri á Fjölni í bikarnum fyrir skömmu að það var engin "grís". Í liðinu eru nokkrir mjög svo jafnir og skemmtilega spilandi strákar sem jafnan er gaman að horfa á. Sameinað lið Hamars og Þórs er áhugaverð blanda af mjög svo efnilegum strákum úr Hveragerði og Þorlákshöfn sem ég hef mikla trú á í framtíðinni. Þeir gerðu sér lítið fyrir og unnu síðasta fjölliðamót með glæsibrag. Það er nánast ómögulegt að spá fyrir um úrslit og verð ég að fá að tvítryggja þennan leik með 1 2.

14:00, úrslit í Stúlknaflokki: Haukar - Grindavík

Ég reikna með svakalegum leik þar sem hér mætast tvö bestu liðin í Stúlknaflokki. Bæði lið eru með afburða leikmenn í sínum röðum og erfitt að spá fyrir um úrslit í leik þar sem dagsformið mun væntanlega hafa mikið að segja. Ég hallast samt að sigri Grindavíkur og spái því að þær Íris Sverrisdóttir og Ingibjörg Jakobsdóttir verði sjóðandi heitar fyrir utan 3ja stiga línuna og verði með 4-5 þrista hvor. Þá skora ég hér á Ölmu Garðarsdóttur að velja körfuna fram yfir aðrar íþróttir sem hún stundar því hún er frábær leikmaður að mínu mati. Hjá Haukum verður Ragna Margrét með sína tvöföldu tvennu í stigum og fráköstum að vanda, ef heilsan er í lagi, og Kristín Fjóla Reynisdóttir lætur vel að sér kveða.

16:00, úrslit í Drengjaflokki: KR - Breiðablik

Blikar hafa gert mót í vetur og eru á toppi A-riðils. Koma Rúnars Inga Erlingssonar hefur ekki aðeins styrkt meistaraflokk félagsins heldur hefur hann stýrt drengjaflokki Breiðabliks til góðra sigra og ljóst að Blikar verða í baráttunni um báða titlana í vetur. Þeir mæta sterku liði KR í úrslitum en þar eru strákar sem eru vanir að vinna og vita hvað þarf til. Ekki er ósennilegt að reynsla KR-inga í svona leikjum vegi þungt um helgina og spái ég þeim sigri eftir þríframlengdan leik og húsverðirnir í Iðu verða orðnir ansi pirraðir á seinkuninni.

Sunnudagur 2. mars:

10:00, úrslit í 9. flokki karla: Keflavík - Njarðvík

Að mér vitandi hafa þessi tvö lið mæst tvisvar í Íslandsmóti í vetur og unnið sitt hvorn leikinn. Miðað við það að Njarðvík er í B-riðli og Keflavík í A-riðli þá verður Keflavík að teljast sigurstranglegra liðið með þá Andri Þór Skúlason og Aron Valtýsson fremsta í flokki. Andri Þór er virkilega efnilegur inni í teig og leikmaður sem þarf að halda vel utan um á næstu árum. Annars vita íþróttaáhugamenn á Íslandi að þegar risarnir í Reykjanesbæ mætast á körfuboltavellinum þá skiptir staða félaganna engu máli og allt getur gerst.

12:00, úrslit í 10. flokki kvenna: Keflavík - Haukar

Haukar verða teljast sigurstranglegri í þessum leik með Guðbjörgu Sverrisdóttur í fararbroddi. Haukar hafa unnið leiki liðanna í vetur og eru núverandi bikarmeistarar í þessum aldursflokki. Engu að síður frábært hjá Keflavík er vera komið í sjálfan úrslitaleikinn þar sem flestar stelpurnar eru að spila upp fyrir sig. Það skildi þó enginn afskrifa þessar Keflavíkurstelpur sem kalla ekki allt ömmu sína.


14:00, úrslit í 11. flokki karla: Breiðablik - Fjölnir

Líkurnar á að Fjölnir tapi leik í 11. flokki eru álíka miklar og að ég verð valinn best klæddi þjálfarinn í IE-deild karla. Fjölnir hefur haft mikla yfirburði í þesum árgangi og efa ég að Pétur Hrafn setji þennan leik á lengjuna þrátt fyrir að hafa trú á sínum mönnum í Breiðabliki. Í þessum tveimur liðum er alls 6 leikmenn af 12 sem skipuðu U16 sl. vor sem varð Norðurlandameistari, þannig að ekki skortir hæfileikana í íþróttahúsi Iðu á meðan þessum leik stendur. Það verður áhugavert að fylgjast með leikstjórnendum liðanna, þeim Arnari Péturssyni og Ægi Steinarssyni, kljást þar sem þeir eru með fljótustu og teknískustu leikmönnum landsins.

16:00, úrslit í Unglingaflokki kvenna: KR - Grindavík

KR er ekki með lið í Íslandsmótinu en vann góðan sigur á Haukum í undanúrslitum og er virkilega gaman að sjá KR eiga lið í kvennaflokki þessa helgi en það hefur ekki gerst síðan þar síðustu öld held ég. Grindavík kemur beint í úrslitaleikinn þar sem þær sátu hjá í undanúrslitum en ég held að það ráði úrslitum að stelpurnar í Grindavík hafa spilað mun oftar saman í vetur í Íslandsmótinu. Grindavík á endalaust af efnilegum stelpum og í þessu unglingaflokksliði eru 3-4 stelpur sem geta náð virkilega langt. KR liðið er einnig vel skipað af efnilegum og sprækum stelpum. Guðrún Gróa Þorsteinsdóttir er ein sú duglegasta stelpa að æfa aukalega sem ég man eftir. Þá á Sigrún Ámundadóttir kost á því að verða einstakur alhliðaleikmaður með réttum æfingum. Þessar tvær verða í aðalhlutverki hjá KR í leiknum.

18:00, úrslit í Unglingaflokki karla: FSu - KR

Þarna mætast stálin stinn og eiga liðin eftir að taka vel á hvort öðru. Það lið sem verður duglegra að skófla í sig skyri síðustu dagana fram að leik stendur hugsanlega uppi sem sigurvegari. Þá gæti heimavöllurinn gert gæfumuninn fyrir FSU. KR teflir fram tveimur "Stjörnuleikmönnum" í þeim Darra Hilmarssyni og Brynjari Björnssyni og væntanlega á mikið eftir að mæða á þeim í leiknum. FSU hefur fengið til baka Árna Ragnarsson úr meiðslum en Árni er leikmaður sem á heima í IE-deildinni og hvergi annarsstaðar. Hann og Brynjar verða áberandi í stigaskorinu í þessum leik en ég spái því að Ingi Þór Steinþórsson, þjálfari KR, kreisti fram sigur, en Ingi hefur verið einstaklega sigursæll með sína flokka.