Jón Arnór Stefánsson hefur verið að leika mjög vel í vetur með liði sínu Lottomatica Roma.

Jón Arnór hefur átt marga góða leiki í vetur og virðist vera í toppformi en hann lenti í erfiðum meiðslum síðasta haust sem hann er nú búinn að ná sér af.

Jón hefur átt sína bestu leiki gegn stórliðunum en hann skoraði til dæmis 19 stig gegn NBA liði Toronto Raptors í æfingaleik í haust og svo 25 stig gegn stórliði Panathinaikos sem eru núverandi Evrópumeistarar. Í gær átti hann góðan leik þegar hann var stigahæstur í tapleik gegn Partizan Igokea í Meistaradeildinni.

Jón hefur leikið sérstaklega vel í Meistaradeildinni í vetur en hann er með 16,6 stig að meðaltali í leik eftir 5 leiki. Hann hefur leikið um 28 mínútur í leik og er með 40,7% þriggja stiga nýtingu og 84,8% nýtingu í vítaskotum.

Næsti leikur Roma í Meistaradeildinni verður 28. nóvember þegar stórlið Barcelona kemur í heimsókn.