Gylfi Kristjánsson, blaðamaður, lést á heimili sínu á Akureyri í fyrrinótt, 59 ára að aldri. Gylfi á sér langa sögu tengda körfuboltanum á Íslandi. Hann lék með ÍR upp úr 1970 og varð Íslandsmeistari með félaginu, settist í stjórn Körfuknattleikssambandsins 1971 og sat þar í 5 ár sem aðalmaður og svo 1 sem varamaður.

Hann var fyrsti framkvæmdastjóri KKÍ 1973 þegar hann var ráðinn í hlutastarf sem slíkur en á þeim tíma var hann varaformaður sambandsins. Seinna meir þjálfaði hann lið Þórs á Akureyri og var lengi liðsstjóri liðsins.

Gylfi vann lengstan hluta ævi sinnar sem blaðamaður en það hófst þegar hann hóf að skrifa um körfuknattleik fyrir Morgunblaðið og hann átti eftir að skrifa um körfuboltann fyrir Vísi, Dag og DV. Eflaust hafa fáir blaðamenn farið jafn oft erlendis með íslenskum körfuknattleiksliðum sem blaðamenn en á áttunda áratugnum fór hann ósjaldan með hinum og þessum liðum sem fóru út fyrir landssteinana að leika körfubolta.

Frétt fengin af karfan.is