Íslandsmótið í körfubolta hófst með formlegum hætti helgina 29.-30. september síðastliðinn með fyrstu leikjum í Íslandsmóti yngri flokka. Í kvöld hefst svo keppni í Iceland Express deild karla með fjórum leikjum og á laugardag hefst keppni í Iceland Express deild kvenna með þremur leikjum. Það hefur skapast hefð að setja Íslandsmótið með formlegum hætti í fyrstu umferð efstu deildar karla. Að þessu sinni verður mótið sett í Vesturbæ Reykjavíkur hjá Íslandsmeisturum KR í DHL höllinni, er þeir taka á móti Fjölni.

Það hefur mikil gróska verið undanfarin ár í körfuboltanum og umfang mótahalds KKÍ hefur aukist ár frá ári og sér ekki fyrir endann á því. Ég tel að margir geri sér í raun ekki grein fyrir því öfluga starfi sem rekið er innan körfuknattleikshreyfingarinnar hringinn í kringum landið. Á þessu keppnistímabili eru alls 35 félög með 49 lið skráð til keppni í meistaraflokk karla auk 14 félaga með 15 lið í meistaraflokki kvenna. Alls tekur 41 íþróttafélag þátt í Íslandsmóti KKÍ í vetur í 15 flokkum. Í fyrstu umferð Íslandsmóts yngri flokka í lok september var keppt í fjórum flokkum í þrettán sveitarfélögum; Hafnarfirði, Hvammstanga, Þorlákshöfn, Vestmannaeyjum, Garðabæ, Höfn í Hornafirði, Akureyri, Ísafirði, Sauðárkróki, Flúðum, Kópavogi, Reykjanesbæ og Selfossi. Þessi upptalning sýnir glögglega hversu vinsæl körfuknattleiksíþróttin er um allt land og undirstrikar þá staðreynd að KKÍ sinnir einu umfangsmesta mótahaldi sérsambanda hér á landi.

Síðastliðinn vetur var góður fyrir körfuboltafólk og var gaman að fylgjast með umræðunni í þjóðfélaginu þegar leið á veturinn. Ég er sannfærður um að þessi vetur verður jafn góður og með samstilltu átaki allra í hreyfingunni getum við gert hann betri.

Að lokum óska ég öllum körfuknatteiksmönnum velfarnaðar og góðs gengis í íþróttahúsum landins, ég hlakka til að hitta ykkur og ræða um körfuboltann.

Áfram körfubolti,
Hannes S.Jónsson
formaður KKÍ