Rússar urðu í gær Evrópumeistarar kvenna í körfubolta eftir að hafa unnið sigur á Spánverjum í úrslitaleiknum 68-74.

Þetta er í fyrsta sinn í sögunni sem sama þjóðin verður Evrópumeistari bæði í karla og kvennaflokki sama árið. Karlalið Rússlands sigraði einnig lið Spánverja í úrslitaleik Evrópumóts karla í september.

Rússar voru sterkari aðilinn í úrslitaleiknum í gær en þær misstu þó næstum niður 21 stiga forskot þegar Spænska liðið kom með áhlaup í seinni hálfleik. Rússnesku stúlkurnar náðu þó að halda forystunni og tryggja sér langþráðan sigur. Með sigrinum tryggðu Rússar sér einnig sæti á Ólympíuleikunum á næsta ári.

Í leik um þriðja sætið sigraði Hvíta Rússland lið Lettlands 72-63.