Spánverjar og Rússar tryggðu sér sæti í úrslitum Evrópumeistaramóts kvenna sem fer fram á Ítalíu um þessar mundir.

Spánverjar unnu sigur á Hvíta Rússlandi 70-54 og Rússar gersigruðu Letta 67-36.

Spánverjar höfðu tapað í undanúrslitum Evrópukeppninnar þrisvar sinnum í röð en tókst loksins að tryggja sér sæti í úrslitunum eftir góðan sigur á Hvíta Rússlandi.

Rússland hefur hins vegar ekki átt í vandræðum með að komast í úrslitaleikinn en liðið hefur leikið í fleiri úrslitaleikjum í Evrópukeppninni en nokkur önnur þjóð.

Liðin mættust í riðlakeppninni og þar tókst Rússum að sigra. Það er ljóst að þarna munu mætast tvær stórþjóðir í Evrópskum körfubolta og það má því búast við góðum úrslitaleik.

Hægt er að fylgjast með gangi mála á heimasíðu FIBA Europe.