Evrópukeppni landsliða heldur áfram á Spáni í dag. Nú er keppni í milliriðlum í fullum gangi og þrír leikir verða í F-riðli í dag.

Í gær var leikið í E-riðli og það voru Spánverjar, Rússar og Ísralir sem sigruðu leiki sína. Rússar unnu Portúgali 78-65, Spánverjar sigruðu Grikki 76-58 en þessi lið mættust í úrslitaleik heimsmeistaramótsins í Japan á síðasta ári þar sem Spánverjar sigruðu einnig. Ísrael sigraði svo Króatíu 80-75 þar sem Yaniv Green var með 17 stig og 16 fráköst.

Rússar eru efstir í riðlinum með 3 sigra í þremur leikjum en Spánverjar og Króatar eru næstir með 2 sigra.

Leikirnir í dag eru ekki af verri endanum. Frakkland mætir Þýskalandi klukkan 14:30 að íslenskum tíma. Þarna mun Dirk Nowitzki, sem var valinn besti leikmaður NBA deildarinnar á síðasta tímabili mæta Tony Parker, besta leikmanni NBA úrslitanna.

Klukkan 17:00 mætast svo Ítalía og Litháen og lokaleikur dagsins verður viðureign Tyrklands og Slóveníu klukkan 19:30.

Hægt er að fylgjast með gangi mála á heimasíðu FIBA Europe.