Bandaríkjamenn unnu sigur á Ameríkuleikunum sem lauk í gær. Þeir lögðu Argentínumenn í úrslitaleiknum 118-81.

Bandaríkjamenn höfðu töluverða yfirburði á mótinu en lið þeirra er skipað helstu stjörnum NBA deildarinnar. Liðið vann alla leiki sína á mótinu og var með 116.7 stig að meðaltali í leik. Bandaríkjamenn hafa því tryggt sér sæti á Ólympíuleikunum 2008 sem verða haldnir í Kína.

LeBron James var stigahæstur Bandaríkjamanna í úrslitaleiknum með 31 stig og Dwight Howard skoraði 20.

Luis Scola var stigahæstur Argentínumanna með 23 stig. Scola var valinn mikilvægasti leikmaður mótsins en hann skoraði 19,5 stig og tók 7,5 fráköst að meðaltali í leik á mótinu og leiddi Argentínumenn í úrslitaleikinn þrátt fyrir að það vantaði margar stjörnur í lið þeirra.

Puerto Rico vann Brasilíu í spennandi leik um bronsið 111-107.