Serbar urðu í gærkvöldi Evrópumeistarar U-20 ára landsliða karla þegar þeir unnu Spánverja í úrslitaleik 87-78.

Þetta er í fyrsta sinn sem liði tekst að verja U-20 ára Evrópumeistaratitil en það tókst Serbum með sigrinum í gærkvöldi. Lið Serba hefur verið mjög sigursælt síðustu árin í Evrópukeppnum en kjarninn úr þessu liði varð Evrópumeistari U-16 ára 2003, U-18 2005 og U-20 2006.

Leikstjórnandi Serba, Milos Teodosic, skoraði 22 stig og sendi 5 stoðsendingar í úrslitaleiknum og fyrirliði liðsins, Milenko Tepic skoraði 20 stig. Teodosic var einnig valinn mikilvægasti leikmaður mótsins en hann var með 15,4 stig, 5,4 stoðsendingar og 2,4 fráköst að meðaltali í 8 leikjum á Evrópumótinu.

Spánverjar byrjuðu úrslitaleikinn betur og komust í 6-0 eftir að Teodosic varð að setjast á bekkinn með 2 villur sem hann fékk í byrjun leiksins. Serbar léku þó góðan varnarleik í leikhlutanum og voru aðeins tveimur stigum undir að honum loknum. Liðin skiptust svo á forystunni í öðrum leikhluta en Serbar enduðu annan leikhlutann af krafti og leiddu í hálfleik 39-33.

Spánverjar byrjuðu þriðja leikhlutann betur og minnkuðu muninn í 2 stig. Serbar náðu þó aftur að auka forystuna og leiddu með 5 stigum í byrjun fjórða leikhluta. Þeir náðu svo að auka forstuna upp í 10 stig í fjórða leikhluta og Spánverjar náðu ekki að vinna upp muninn.