Panathinaikos urðu í gærkvöldi grískir meistarar þegar þeir sigruðu Olympiakos í 5 leik úrslitanna í grísku A-1 deildinni.

Þetta er í 9. skiptið á síðustu 10 árum sem að Panathinaikos vinnur gríska titilinn en félagið hefur alls unnið hann 28 sinnum. Í ár urðu þeir einnig bikarmeistarar og sigruðu Evrópudeildina. Þetta var því sannkallað draumatímabil hjá "þeim grænu".

5. leikurinn, sem leikinn var í troðfullri Ólympíuhöll Aþenu, var jafn og spennandi. Olympiakos voru einu stigi yfir í hálfleik 45-46 en Panathinaikos lék vel í þriðja leikhluta og var með 11 stiga forystu að honum loknum. Gestirnir náðu þó góðum spretti í fjórða leikhlutanum og minnkuðu muninn í 77-73 þegar tvær og hálf mínúta voru eftir af leiknum.

En Ramunas Siskauskas skoraði mjög mikilvæga þriggja stiga körfu fyrir Panathinaikos í næstu sókn og eftir það virtust Olympiakos ekki hafa kraft í annan sprett. Panathinaikos náði því að landa sigrinum. Lokatölur leiksins voru 89-76.

Dimitris Diamantidis var valinn maður leiksins en hann sýndi gífurlega baráttu og virtist draga Panthinaikos áfram til sigurs. Michael Batiste var stigahæstur með 15 stig og Ramunas Siskauskas skoraði 12 stig fyrir Panathinaikos. Hjá Olympiakos voru Alex Acker, Manolis Papamakarios og Andrija Zizic með 12 stig.