Real Madrid og Barcelona komust í gærkvöldi í úrslit spænsku ACB deildarinnar í körfubolta.

Bæði lið þurftu að leika oddaleiki til þess að tryggja sér sæti í úrslitunum. Barcelona sigraði deildarmeistara Tau Ceramica 95-79 og Real Madrid sigraði DKV Joventud 65-61 í spennandi leik.

Juan Carlos Navarro átti góðan leik fyrir Barcelona gegn Tau Ceramica. Þessi snjalli bakvörður skoraði 11 stig í þriðja leikhlutanum þegar Barcelona náði góðri forystu sem að þeir gáfu ekki eftir það sem eftir var af leiknum. Navarro skoraði alls 23 stig í leiknum og Gianluca Basile skoraði 24 stig fyrir Barcelona. Hjá Tau Ceramica var Serkan Erdokan stigahæstur með 19 stig.

Viðureign Real Madrid og DKV Joventud var gífurlega spennandi. Heimamenn í Real Madrid nýttu vel 14.000 stuðningsmenn, sem að fylltu íþróttahöllina í Madrid, og náðu að komast yfir 16-8 í byrjun leiks. Joventud náði þó að komast til baka og leikurinn var jafn fram á lokamínútuna. Real Madrid náði að komast yfir í lokin og leikmenn liðsins hittu svo úr mikilvægum vítaskotum í lokin og tryggðu þar með sigurinn.

Louis Bullock skoraði 16 stig í leiknum og Raul Lopes var með 13 fyrir Real Madrid. Hjá DKV Joventud var Rudy Fernandes stigahæstur með 15 stig.

Það er því í vændum mjög áhugavert úrslitaeinvígi á milli þessarra miklu stórvelda á Spáni.