Á stjórnarfundi FIBA Europe í morgun var kosið og ákveðið hvar næsta keppni EM, EuroBasket 2017, hjá körlum verður haldin en í ljós þess hversu frábærlega keppnin tókst í sumar með því að halda riðlana í fjórum löndum var ákveðið að halda því áfram.

Löndin sem halda riðlakeppni EuroBasket karla 2017 eru Finnland, Ísrael, Rúmenía og Tyrkland. Pólland sótti einnig um en hlaut ekki kosningu að þessu sinni. Úrslitin fara svo fram í Tyrklandi en þeir héldu HM karla 2010 og HM kvenna 2014 og eru því ýmsu vanir.

Rúmenía hélt ásamt Ungverjum EM kvenna í sumar en Ísrael hefur aldrei haldið riðil né keppni áður. Leikið verður í borgunum Cluj-Napoca í Rúmeníu og Tel Aviv í Ísrael.

Finnland hélt EM 1967 á 50 ára lýðveldisafmæli þeirra og því fá þeir keppnina aftur núna á 100 ára afmælinu og ljóst að ef Ísland verður meðal þátttökuþjóða á ný að þá yrði óskandi að leika í riðli með Finnum fyrir íslenska aðdáendur þar sem það ferðalag yrði þægilegast.

Undankeppni fyrir EM hefst í 31. ágúst 2016 og lýkur 17. september en leikið verður í fjögura liða riðlum en það kemur í ljós með hvaða þjóðum Ísland leikur í undankeppninni þann 22. janúar nk. þegar drátturinn fer fram í Þýskalandi.