Íslenska kvennalandsliðið verður með einskonar innanbúðarmann þegar liðið hefur undankeppni EM 2017 í Ungverjalandi á laugardaginn kemur.

Helena Sverrisdóttir, fyrirliði íslenska kvennalandsliðsins í körfubolta, þekkir ekki aðeins vel til íþróttahallarinnar í Miskolc heldur hefur hún einnig spilað með fjórum leikmönnum liðsins og á móti hinum flestum.

Helena spilaði með liði Aluinvent DVTK Miskolc í ungversku deildinni veturinn 2013-14 þar sem hún var með 15,5 stig að meðaltali í leikjum liðsins í Evrópukeppninni.

Þrjár aðrar úr liði Aluinvent DVTK Miskolc þennan vetur eru í hópi Ungverja fyrir leikinn á móti Íslandi í Evrópukeppninni.

Þetta eru bakvörðurinn Timea Czank sem var í stóru hlutverki í liðinu en einnig léku með Helenu mjög efnilegur framherji Debora Dubei (aðeins 16 ára þetta tímabil) og svo leikstjórnandinn Bernadett Horvath sem var aðeins 17 ára þetta tímabil.

Timea Czank var með 5,1 stig og 2,3 stoðsendingar að meðaltali í Evrópukeppninni, Debora Dubei skoraði 4,5 stig í leik og Bernadett Horvath var með 1,3 stig í leik.

Þær Timea Czank og Bernadett Horvath eru enn hjá DVTK Miskolc liðinu en Debora Dubei skipti yfir í Euroleague-liðið Uniqa Sopron í sumar.

Fjórði leikmaður ungverska liðsins spilaði ekki með Helenu í Ungverjalandi heldur voru þær saman í liði í slóvakíska liðinu Good Angels Kosice tímabilið á undan.

Sú um ræðir er miðherjinn Tijana Krivacevic sem er fædd í Serbíu en ólst upp í Ungverjalandi þar sem faðir hennar starfaði sem þjálfari. Krivacevic er 25 ára gömul og 196 sm á hæð samkvæmt FIBA en er þó líklega meira í kringum 194 sm.

Tijana Krivacevic var valin í WNBA-deildin árið 2010 en hefur alla tíð spilað í Evrópu. Veturinn 2013-14 þegar þær Helena voru saman í liði var Krivacevic með 9,5 stig og 4,4 fráköst að meðaltali í Evrópukeppninni en Helena skoraði þá 5,2 stig og tók 2,8 fráköst í leik.