Í kvöld kemur í ljós hvaða tvö lið munu leika til úrslita um Íslandsmeistaratitilinn í Iceland Express deild karla.

Fjörið hefst klukkan 19:15 í DHL höllinni þar sem KR tekur á móti Snæfellingum. Síðustu tvær viðureignir þessara liða unnust á útivelli.

Leikur Njarðvíkur og Grindavíkur hefst klukkan 20:00. Í þessari viðureign hafa sigurvegarar hvers leiks verið á heimavelli.

Sýn verður með beina útsendingu frá leik KR og Snæfells en mun sýna inn á milli frá hinum leiknum. Þegar leikurinn er að klárast í vesturbænum er seinni hálfleikur að hefjast í Njarðvík og þá mun Sýn vera með allan seinni hálfleikinn í beinni.

Það verður því alger körfuboltaveisla í kvöld. Heimasíður félaganna hafa bent sínum stuðningsmönnum á að vera mættir snemma á leikstað til að forðast troðning og til þess að fá sæti.