Í kvöld klukkan 19:15 hefjast úrslit Iceland Express deildar kvenna þegar Haukar taka á móti Keflavík að Ásvöllum í Hafnarfirði.

Það er mikil eftirvænting fyrir þetta einvígi en þessi lið hafa leikið marga stórleiki í gegnum tíðina. Skemmst er að minnast úrslitaleiks Lýsingarbikarsins þar sem að úrslitin réðust ekki fyrr en á lokasekúndunum. Þar sigruðu Haukar með einu stigi 78-77.

Liðin mættust alls fjórum sinnum í Iceland Express deildinni í vetur og sigruðu Haukar í þremur leikjum en Keflavík einu sinni. Haukar sigruðu fyrsta leikinn 90-81, Keflavík náði svo að sigra næsta leik 92-85, þriðja viðureign liðanna fór 95-84 fyrir Hauka. Síðasti leikur liðanna var æsispennandi en Haukar náðu að sigra hann 79-81.

Það má því búast við því að úrslitaeinvígið verði mjög spennandi og skemmtilegt ef að leikirnir verða svipaðir leikjum liðanna í vetur.