Úrslitakeppni Iceland Express deildar karla hefst í kvöld. Það verða tveir æsispennandi leikir í kvöld og fjörið heldur svo áfram á morgun þegar hinar tvær viðureignirnar hefjast.

Í kvöld mætast Snæfell og Keflavík í Stykkishólmi og KR fær ÍR í heimsókn í DHL-Höllina í Vesturbænum.

Snæfell og Keflavík hafa leikið marga spennuleiki í gegnum tíðina og má búast við skemmtilegum leik í kvöld í Stykkishólmi. Snæfell sigraði báða leiki liðanna í Iceland Express deildinni í vetur. Sá fyrri í Stykkishólmi endaði 80-67 en sá síðari 81-86. Sá leikur var í síðustu umferð Iceland Express deildarinnar og var æsispennandi. Það verður því fróðlegt að sjá hvernig leikurinn í kvöld þróast. Leikurinn hefst klukkan 19:15.

Leikur KR og ÍR hefst klukkan 20:00 í kvöld og verður hann í beinni útsendingu á Sýn. KR sigraði báða leiki liðanna í Iceland Express deildinni í vetur. Þann fyrri 66-81 í Seljaskóla og þann seinni 89-81 í DHL-Höllinni. Seinni leikurinn var æsispennandi og margir telja að þessi viðureign geti orðið gífurlega spennandi.