Um helgina verða bikarúrslit yngri flokka í DHL-Höll KR-inga. Á sunnudeginum verða 4 leikir. Benedikt Guðmundsson tók saman pistil um leikina á sunnudeginum.

Sunnudagur 11. mars

10:00 9. flokkur stúlkna Haukar – Hamar/Selfoss
Haukar verða að teljast líklegri til að vinna þennan leik. Einnig er skrambi gott hjá Hamri að vera komið í sjálfan úrslitaleikinn eftir tvo mjög góða sigra gegn Njarðvík og Keflavík. Haukar hafa ekki tapað leik í þessum flokki í vetur og unnið leiki þessara liða í vetur. Ég spái Haukasigri í leik þar sem Guðbjörg Sverrisdóttir verður valinn maður leiksins eftir að hafa farið hamförum og undirstrikar að hún getur orðið jafn góð og stóra systir.

12:00 10. flokkur drengja Fjölnir – Fjölnir B
Athyglisverður leikur þar sem 10 flokkur Fjölnis leikur gegn 9. flokki. Spurning hvort leikurinn verður færður í Rimaskóla. Að öllu eðlilegu munu eldri strákarnir hafa betur og vinna nokkuð sannfærandi sigur. Spurning hvort Haukur Pálsson muni spila sitt hvorn hálfleikinn en strákurinn leikur stór hlutverk með báðum flokkum. Bæði lið eiga væntanlega eftir að finna fyrir góðum stuðningi þar sem eingöngu mun heyrast “áfram Fjölnir” á pöllunum. Allavega verður þetta hraður og skemmtilegur leikur þar sem bæði lið eru alin upp við hraða leiki og búa yfir góðri tækni.

14:00 Unglingaflokkur kvenna Haukar - Keflavík
Samkvæmt mínum heimildum mun vanta lykilmenn í bæði lið sem þær Helena Sverrisdóttir og María Ben Erlingsen verða erlendis akkúrat þessa helgi. Þannig að það mun reyna töluvert á aðra leikmenn sem fá tækifæri til að stíga upp og slá í gegn í sjálfum bikarúrslitaleiknum. Ekki er leikið í unglingaflokki kvenna í Íslandsmóti og einungis 3 lið tóku þátt í bikarnum og því erfitt að meta styrk þessara liða en ég ætla að spá Keflavík sigri þar sem þær Bryndís Guðmundsdóttir og Ingibjörg Vilbergsdóttir verða í aðalhlutverkum.

16:00 Drengjaflokkur Keflavík - Fsu
Keflavík hefur verið að spila vel í þeim leikjum sem ég hef séð þá spila og tróna á toppnum í drengjaflokki. Fsu er meira óskrifað blað þar sem þeir taka ekki þátt í Íslandsmótinu. Engu að síður hefur Fsu marga öfluga leikmenn á borð við Hörð Helga Hreiðarsson sem er alhliða framherji. Hjá keflavík verða þeir Sigurður Þorsteinsson og Þröstur Jóhannsson í aðalhlutverkum en Fsu má ekki vanmeta duglegan strák eins og Elvar Sigurjónsson sem nýtur sín vel í skugganum af Sigurði og Þresti en skilar góðri vinnu. Ég spái keflavík sigri þar sem Þröstur verður óstöðvandi og skorar 30+, þar af 10+ úr “kirsuberjahlaupum”.