Í kvöld klukkan 19:15 hefjast 6 síðustu leikir deildarkeppninnar í Iceland Express deild karla. Enn er ekki komið á hreint hverjir fylgja Haukum niður í aðra deild og heldur ekki hverjir ná öðru sæti deildarinnar.

Fjölnir mætir Tindastóli í Grafarvogi. Ef að Fjölnir nær að sigra og Þór Þorlákshöfn tapar gegn Njarðvík þá heldur Fjölnir sér í deildinni. Það er því gríðarlega mikið í húfi fyrir Fjölni og hafa þeir kynnt leikinn vel í Grafarvoginum og stefna á að fylla húsið í kvöld. Fyrri leikur liðanna í vetur fór 96-84 fyrir Tindastól. Hægt er að lesa meira um leikinn á heimasíðu Fjölnis.

Í Þorlákshöfn taka heimamenn í Þór á móti deildarmeisturunum frá Njarðvík. Ef að Þórsarar sigra þá tryggja þeir sér sæti í Iceland Express deildinni á næsta tímabili. Fyrri leikur liðanna var æsispennandi og endaði með sigri Njarðvíkinga 105-100eftir framlengingu.

Skallagrímur tekur á móti ÍR í Borgarnesi. Skallagrímur er í baráttu um 2. sæti deildarinnar en ÍR-ingar eru öruggir með 7. sætið. ÍR sigraði fyrri leik liðanna 95-82.

Í Keflavík verður stórleikur þegar Snæfell kemur í heimsókn. Keflvíkingar þurfa að sigra til þess að tryggja sig í 5. sæti deildarinnar en Snæfell er í baráttu um að halda 3. sætinu. Síðasti leikur liðanna endaði 80-67 fyrir Snæfell.

Í DHL-Höllinni mætast KR og UMFG. KR-ingar tryggja sér 2. sæti deildarinnar með sigri í leiknum en UMFG á möguleika á að komast upp fyrir Keflavík ef að þeir ná að sigra í kvöld. Fyrri viðureign liðanna endaði með sigri KR 78-89.

Í Hafnarfirði taka Haukar á móti Hamar/Selfoss. Fyrri leikur liðanna í vetur endaði með sigri Hamars/Selfoss 99-86.

Nánari umfjöllun um leiki kvöldsins er að finna hér.

Staðan í deildinni.