ÍR – Snæfell. Hérna mætir Bárður sínum gömlu félögum í fyrsta sinn. Hlynur og Sigurður Þorvaldsson komnir heim úr atvinnumennsku, Sigurður fyrrum ÍR ingur. Þetta verður skemmtilegur slagur. ÍR ekki sáttir við sína byrjun í deildinni og ætla örugglega að ná sér í sigur. Snæfell verið að sigla þetta í rólegheitum, eru búnir að byrja ágætlega og eru sem stendur í 3. – 4. sæti. Mjög mikilvægur leikur fyrir ÍR sem eru einungis búnir að vinna 1 leik af þeim 4 sem búnir eru.

Haukar – KR. Oft verið hörkuleikir á milli þesara liða í gegnum tíðina. Margir á því að allt annað sé að sjá Haukaliðið í dag eftir að Hjörtur Harðarson tók við liðinu, nú sé loksins gaman að horfa á þá spila. Kominn Keflavíkurstimpill á leikstíl liðsins, farnir að leika hraðari bolta. Það er einnig ” nýr gamall “ þjálfari í herbúðum KR inga en þar er Benedikt Guðmundsson við stjórnvölinn. Liðið hefur byrjað vel undir hans stjórn, unnið m.a. Keflavík í Keflavík sem verður að teljast nokkuð gott. KR er sem standur í 3. – 4. sætinu ásamt Snæfell, unnu reyndar Snæfell í innbyrðisviðureign og teljast því ofar en Snæfell.

Þór Þorlákshöfn – Keflavík. Nýliðar Þórsara hafa sýnt að þeir geta unnið fullt af leikjum og það þýðir ekkert að vanmeta þá þrátt fyrir að þeim hafi verið spáð falli. Þeir eru með ágætis blöndu af leikmönnum, vantar kannski aðeins upp á breiddina. Keflavíkingar hafa ekki enn náð sínum besta takti en verða betri þegar líður á eins og undanfarin ár sýna. Verður fróðlegt að sjá hvernig nýliðarnir taka á móti stórliði Keflavíkur.

Toppslagur umferðarinnar.

Njarðvík – Grindavík. Hérna mætast einu taplausu liðin það sem af er og má búast við miklum slag eins og alltaf þegar þessi lið mætast. Í fyrra þurfti að framlengja báðar viðureignir þessara liða og fóru Grindvíkingar með sigur af hólmi í bæði skiptin. Það má reikna með að Njarðvíkingar vilji eitthvað kvitta fyrir það. Það sem er líka skemmtilegt við þessa viðureign er að í þjálfarastól gestanna frá Grindavík er Friðrik Ragnarsson sem um árabil lék með og þjálfaði lið Njarðvíkur. Það má lofa frábærum körfubolta í ljónagryfjunni í Njarðvík í kvöld.

5. umferð lýkur á morgun föstudag með 2 leikjum.

Fjölnir – Skallagrímur. Fjölnisliðið hefur verið nokkuð sveiflukennt í upphafi móts. Það var ekki reiknað með miklu af þeim en þeir hafa þó sýnt að þeir geta unnið hvern sem er á góðum degi. Þeir unnu m.a. Keflavík á heimavelli í 3 umferð í stórkostlegum körfuboltaleik 110 – 108 eftir framlengdan leik. Hafa oft verið sterkir á heimavelli. Skallagrímsmenn hafa byrjað á mjög svo krefjandi leikjaniðurröðun í upphafi móts en þeir hafa nú leikir gegn Njarðvík, Keflavík og KR. Hefðu hæglega getað unnið alla þessa leiki en náðu að vinna KR í Vesturbænum og fylgdu því svo eftir með því að vinna Hamar / Selfoss í næsta leik og eru með 2 sigra og 2 töp.

Hamar / Selfoss – Tindastóll. Þetta verður áhugaverður leikur. Heimamenn ekki byrjað vel en það hefur svo sem gerst áður hjá þeim en Pétur Ingvarsson kann þá list að koma sínum mönnum af stað aftur, svona rétt þegar allir eru við það að afskrifa þá. Það sem verður einnig fróðlegt að sjá er hvernig George Byrd fellur inn í liðið en hann þekkja allir frá því að hann lék með Skallagrímsmönnum sl. 2 ár. Tindastólsmenn hafa byrjað þessa leiktíð nokkuð vel og eru ekki á því að falla sem þeim var spáð fyrir mót. Í þeirra liði eru margir góðir körfuboltamenn og Lamar nokkur Karim farið á kostum. Lamar er ekki hár í loftinu en hann er feykilega öflugur spilari sem býr yfir miklum sprengikrafti. Þetta verður mjög áhugaverður leikur.