Síðasti leikur í annarri umferð Iceland Express deildar karla verður leikinn í kvöld á Sauðárkróki. Þar mætast nýliðarnir í deildinni Tindastóll og Þór Þorlákshöfn. Fjórir leikir voru leiknir á sunnudaginn og einn í gær.

KR sigraði Keflavík á útivelli í gærkvöldi með 11 stiga mun 91-80.
Keflvíkingar byrjuðu betur í leiknum en KR-ingar vöknuðu fljótlega til lífssins og náðu forystunni. Þeir héldu henni svo allan leikinn og unnu nokkuð örugglega. Tyson Patterson skoraði 21 stig og sendi 10 stoðsendingar fyrir KR en Magnús Þór Gunnarsson skoraði 23 stig fyrir Keflavík.

Á sunnudaginn voru fjórir leikir. Í Borgarnesi tók Skallagrímur á móti Njarðvík í hörkuleik. Það var jafnt framan af leiknum en Skallagrímsmenn fóru að hitta mjög vel þegar leið á fyrri hálfleikinn. Þeir náðu því forystunni á tímabili en Njarðvík náði að vinna upp forskot þeirra og komast yfir. Lokakaflinn var æsispennandi en lokaskot Dimitars Karadzovskis geigaði og sigurinn var því Njarðvíkinga.

ÍR vann stórsigur á Hamar/Selfoss á Selfossi 90-62. ÍR-ingar tefldu fram nýjum erlendum leikmanni, Winston LaMar Owen og skoraði hann 20 stig í leiknum og var stigahæstur ÍR-inga ásamt Eiríki Önundarsyni.

Grindavík sigraði Hauka í Grindavík með 10 stiga mun 95-85. Leikurinn var jafn til að byrja með en í seinni hálfleik náðu Grindvíkingar 24 stiga forystu. Haukar náðu þó að koma sér aftur inn í leikinn með góðri baráttu en Grindvíkingar stóðust áhlaup þeirra og lönduðu sigri. Steven Thomas lék mjög vel fyrir Grindavík en hann skoraði 24 stig og tók 23 fráköst í leiknum.

Í Stykkishólmi var leikur Snæfells og Fjölnis. Það var ekki mikið skorað í þessum leik en Snæfell náði að sigra með 67 stigum gegn 60. Jón Ólafur Jónsson skoraði 16 stig á 21 mínútu fyrir Snæfell en Patrick Oliver var stigahæstur hjá Fjölni með 18 stig.

Grindavík, KR og Njarðvík eru því efst í deildinni eins og staðan er í dag en Þór Þorlákshöfn getur komist að hlið þeirra ef að þeir ná að sigra Tindastól í kvöld.

Hægt er að sjá stöðuna í deildinni og nálgast tölfræði leikjanna .hérna