Það verður sannkölluð körfuboltaveisla um helgina. Á morgun verða 4 liða úrslit í Powerade bikarkeppni karla. Þar mætir annars vegar Skallagrímur Keflavík og hins vegar mun Njarðvík leika gegn KR.
Á föstudaginn verða svo fjögurra liða úrslit kvenna þegar Haukar og ÍS mætast klukkan 19:00 og Keflavík og Grindavík klukkan 21:00.
Sjálf úrslitin í karla- og kvennaflokki verða svo á laugardaginn.
Kvennaleikurinn hefst klukkan 14:00 en karlaleikurinn klukkan 16:00.

Það kom fram á blaðamannafundi sem að haldin var í Laugardalnum í dag að öll liðin eru klár í slaginn. Liðin munu tefla fram sínum sterkustu liðum. Þjálfarar og leikmenn hlakka til þess að spila hörkuleiki gegn toppliðum um helgina.

Valur Ingimundarson, þjálfari Skallagríms, sagði að hann væri mjög ánægður með það að hefja körfuknattleikstímabilið með þessari keppni. Hann nefndi að þetta væri skemmtileg leið fyrir bæði iðkendur og áhugamenn til þess að byrja veturinn og kynnast liðunum.
Valur vonaðist til þess að Borgnesingar myndu fjölmenna í Laugardalshöllina á morgun en þetta er í fyrsta sinn sem að Skallagrímur kemst í fjögurra liða úrslit fyrirtækjabikarsins.

Það er upplagt fyrir alla körfuboltaunnendur að mæta í Höllina um helgina og sjá stórleiki á milli liðanna sem að enduðu í toppsætunum á síðasta tímabili.

Hér má skoða sögu fyrirtækjabikars kvenna og karla.