Íslendingar töpuðu á laugardaginn á útivelli gegn Austurríkismönnum 85-64. Þetta var lokaleikur landsliðsins á þessu ári í b-deild Evrópukeppninnar í körfuknattleik en keppninni lýkur næsta haust.
Það er ljóst að tapið gegn Austurríkismönnum er mikið áfall en það þýðir að draumurinn um sæti í A-deild Evrópukeppninnar er úti.

Leikurinn gegn Austurríki var þó jafnari en tölurnar gefa til kynna. Magnús Gunnarsson kom okkur yfir 49-47, með þriggja stiga körfu þegar tvær og hálf mínúta var eftir í þriðja leikhluta. Leikurinn var svo í járnum fram í miðjan fjórða leikhluta en þá fengum við á okkur 7 stig í sömu sókninni vegna tæknivillu sem dæmd var á íslenska liðið. Austurríkismenn settu öll vítin sín niður og skoruðu svo þriggja stiga körfu í kjölfarið.
Eftir þetta gekk ekkert hjá okkur en Austurríkismenn gengu á lagið og juku muninn á lokamínútunum. Þeir sigruðu lokaleikhlutann 32-14.

Austurríkismenn nýttu sér hæðarmun sinn vel í leiknum en þeir eru með hávaxið lið. Þeir tóku 17 sóknarfráköst á meðan við tókum aðeins 6. Benjamin Ortner skoraði 32 stig og tók 13 fráköst fyrir Austurríki og Bernd Volcic skoraði 28 stig.
Hjá Íslandi var Logi Gunnarsson stigahæstur með 14 stig.