Heimsmeistaramótið í körfubolta hefst í dag í Japan. Leikið verður í öllum fjórum riðlunum og ljóst er að margir góðir leikir verða í fyrstu umferð.

Í A-riðli stendur uppúr leikur Argentínu og Frakklands. Argentínumenn eru Ólympíumeistarar en hefur gengið illa í æfingaleikjum fyrir mótið. Frakkar eru með mjög efnilegt lið en urðu þó fyrir miklu áfalli þegar Tony Parker puttabrotnaði í æfingaleik á dögunum.

D-riðillinn er mjög áhugaverður en ljóst er að það eru margir sem að munu fylgjast vel með Bandaríkjamönnum á þessu móti. Þeir munu leika fyrsta leik sinn gegn Puerto Rico en það gerðu þeir einnig á Ólympíuleikunum í Aþenu. Í þeirri viðureign komu Puerto Rico öllum á óvart og burstuðu Bandaríkjamennina þannig að það verður gaman að sjá hvað gerist í þetta sinn.

Einnig verður fróðlegt að fylgjast með leik Ítala og Kínverja í D-riðli. Ítalir léku til úrslita á Ólympíuleikunum og eru með mjög sterkt lið. Kínverjar eru með marga mjög efnilega leikmenn og hafa endurheimt Yao Ming eftir meiðsli svo að þeir eru til alls vísir.

Mikið hefur verið rætt um mótið víðs vegar um heiminn og flestir hafa einhverja skoðun á því hverjir séu líklegir til afreka á mótinu. Hérna má finna grein þar sem lítillega er fjallað um öll liðin á HM.

Það er hægt að lesa meira um leikina, skoða úrslit og tölfræði á heimasíðu mótsins.