Íslensku strákarnir töpuðu í dag gegn sterku liði Slóvena sem höfðu yfir 17-48 í hálfleik. Strákarnir náðu að rétta sinn hlut
í síðari hálfleik og endaði leikurinn með 29 stigum 56-85. Ólafur ólafsson var stigahæstur með 15 stig.

Það var líkt og Íslensku strákarnir væru á leið til slátrunar þegar að leikurinn gegn Slóvenum hófst fyrr í dag. Mistökin sem liðið var að gera voru mýmörg og í heildina 20 í þeim fyrri. Slóvenar nýttu sér mistök strákanna vel og skoruðu grimmt. Íslenska liðið náði varla skoti á körfuna í fyrsta leikhluta eða í heildina 11, þar af 8 tveggja stiga og 3 þriggja. Liðið tapaði 13 boltum í leikhlutanum og það gengur varla í þessum styrkleika sem strákarnir eru að leika á. Staðan eftir fyrsta leikhluta 5-23.

Í öðrum leikhluta héldu Slóvenar áfram að bæta við forystuna og spiluðu allir leikmenn Íslands í hálfleiknum. Staðan eftir dapra frammistöðu var 17-48, þannig að leikhlutinn fór 12-25. Áfram voru yfirburðir Slóvena miklir og þegar að strákarnir náðu að stoppa þá undir körfunni, þá sendu þeir boltann út og hittu þeir vel fyrir utan þriggja stiga línuna eða úr fjórum af fimm skotum.

Það var allt annað íslenskt lið sem kom til leiks í síðari hálfleik, en Baldur Þór lék einsog hann er þekktur fyrir og kom einnig Arnþór Freyr mjög sterkur til leiks. Annars er það ógnin innan teigs sem er helsta vandamál okkar manna, en það vantar jafnvægi á milli þar. Menn voru staðnir í fyrri hálfleik gegn svæðisvörn Slóvena, en í þeim síðari var allt annað að sjá til liðsins. Leikhlutinn fór 23-17 fyrir Ísland og staðan því 40-65.

Fjórði leikhluti var svipaður og sá þriðji nema að allir fengu tækifæri í honum og leystu þeir það ágætlega, liðið barðist til síðustu sekúndu og bættu upp fyrir arfaslakan fyrri hálfleik. 29 stig tap var staðreynd og fjórða sætið í riðlinum tryggt, þar sem að Grikkir sigruðu Letta og eiga strákarnir ekki möguleika á að færast ofar í riðlinum. Það verður því leikur "SJÖ" sem ræður því hvort Ísland muni eiga lið í A-deild
að ári eður ei. Það er ekki orðið ljóst hvaða lið það verður, en það mun koma í ljós á morgun eftir síðustu umferðina.

Tölfræði leiksins

Sigmundur Már Herbertsson dæmdi í dag leik Serba og Ítala en hann endaði 78-69 og er vel af honum látið.

Það má einnig nefna það að Íslenska liðið hefur fengið hrós frá mótshöldurum og dómurum í keppninni fyrir kurteisi og baráttu. Liðið gefst ekki upp þrátt fyrir erfiða stöðu
og hefur virt dómara mótsins.