Íslenski FIBA-dómarinn Björgvin Rúnarsson er nú staddur með 16 ára landsliði kvenna i Jyvaskyla í Finnlandi þar sem hann dæmir fyrir Íslands hönd í b-deild evrópumótsins. Björgvin er nýkominn frá Chieti á Ítalíu þar sem að hann dæmdi sex leiki á samskonar Evrópumóti 18 ára kvenna og nær því að vera að sinna dómarastörfum fyrir FIBA-Europe í heilan mánuð áður en hann snýr aftur til Íslands eftir miðjan ágústmánuð.

Björgvin flaug til London frá Ítalíu líkt og restin af íslenska hópnum sem tók þátt í b-deild evrópumóts 18 ára stelpna en fór ekkert heim heldur beina leið til Finnlands. Björgvin kemur því ekkert aftur til Íslands fyrr en að mótinu líkur 13. ágúst næstkomandi. Þetta er því örugglega eins sú lengsta ferð íslensk dómara á erlenda grundu en er hún aðeins nokkra daga frá því að fylla upp í einn mánuð.

Björgvin er þegar búinn að dæma sinn fyrsta leik á mótinu í Jyvaskyla þrátt fyrir að íslensku stelpurnar byrji ekki að spila fyrr en á morgun. Björgvin dæmdi leik Þýskalands og Hollands á miðvikudagskvöldið en honum lauk með 17 stiga sigri Þjóðverja, 70-53. Björgvin dæmdi leikinn með danska dómaranum Rune Larsen. Á Ítalíu dæmdi Björgvin sex leiki á tíu dögum með dómurum frá Englandi, Slóveníu, Rúmeníu, Makedóníu og Ítalíu. Hann dæmdi flesta með Slóvenanum Matej Spendl eða tvo.