Finnar unnu átta stiga sigur á Íslendingum á Norðurlandamótinu í Tampere í Finnlandi, 73-81. Næsti leikur Íslands er gegn Svíþjóð á morgun, 3. ágúst kl. 14.30 að íslenskum tíma.

Byrjunarlið Íslands í leiknum er þannig skipað: Jakob Sigurðarson, Logi Gunnarsson, Jón Nordal Hafsteinsson, Egill Jónasson og Friðrik Stefánsson.

Tölfræði leiksins

Finnar byrjuðu mun betur og eftir 5 mínútna leik var staðan 6-15 fyrir Finna og íslensku strákarnir ekki að finna sig. Strákarnir komust betur inn í leikinn með stórgóðri innkomu fyrirliðans Magnúsar Þórs Gunnarssonar sem setti niður 2 þrista á 15 sek kafla og fékk víti að auki í seinna skotinu. Íslenska liðið náði að koma muninum niður í 4 stig í upphafi seinni hálfleiks en Finnar svöruðu jafnharðan fyrir sig og voru jafnan með 7-9 stiga forskot. Slæmur kafli í lok 3ja leikhluta þar sem íslenska liðið tapaði boltanum þrisvar sinnum í röð kostaði það að munurinn varð of mikill en mestur varð munurinn 19 stig í fjórða leikhluta. Strákarnir átt þó möguleika er þeir Magnús Þór (5 af 10) og Páll Axel Vilbergsson (3 af 5)settu niður nokkra þrista og fór munurin niður í 8 stig en lengra komst íslenska liðið ekki.
"Slæm byrjun varð okkur að falli í þessum leik, við þurftum að elta allan leikinn. Þá töpuðum við of mörgum boltum 23 á móti 13 hjá Finnum oft á mikilvægum augnablikum. Þá var greinilegt að Finnska liðið er betur samhæft en við á þessum tímapunkti en þeir eru nýbúnir að leika vo æfingaleiki við Eistland. Við sýndum mikinn karakter og strákarnir börðust eins og ljón til að komast aftur í leikinn í lok hans og litlu mátti muna að það tækist. Nú er bar aað einbeita sér að næstu leik gegn Svíþjóð, en þar ætlum við okkur sigur", sagði Sigurður Ingimundarson eftir leikinn en blaðamannafundur var haldinn fyrir utan íþóttahúsið hér í Tampere enda glampandi sól og tæplega 30 stig hiti.

Helstu tölur úr leiknum:

Magnús Þór Gunnarsson 18 stig, 6 fráköst og 1 stoðsending
Páll Axel Vilbergsson 14 stig og 5 fráköst
Arnar Freyr Jónsson 10 stig og 5 fráköst
Helgi Magnússon 9 stig, 1 frákast og 1 stoðsending
Logi Gunnarsson 7 stig, 1 frákast og 5 villur (fór af velli fljótlega í fjórða leikhluta.
Friðrik Erlendur Stefánsson 6 stig og 6 fráköst
Jakob Sigurðarson 6 stig og 1 stoðsending
Hlynur Bæringsson 2 stig, 5 fráköst og 2 stoðsendingar
Jón Nordal Hafsteinsson 1 stig
Egill Jónasson 7 fráköst
Axel Kárason kom ekki inná í fyrsta landsleik sínum.

Fyrri leikur dagsins var viðureign Dana og Norðmanna, en leiknum lauk með stórsigri Dana, 97-62.