Íslensku dómararnir fjórir, þeir Björgvin Rúnarsson, Einar Þ. Skarphéðinsson, Erlingur S. Erlingsson og Jón Guðmundsson stóðu fyrir sínu á Norðurlandamótinu í Svíþjóð sem lauk í dag. Þrír þeirra dæmdu úrslitaleiki á mótinu og sá fjórði dæmdi leik um bronsverðlaun.

Þeir Björgvin Rúnarsson og Jón Guðmundsson fengu það hlutverk að dæma úrslitaleik Svía og Finna í U16ka. Úr varð hörkuleikur og stóðu okkar menn sig mjög vel, eins og við var að búast. Erlingur S. Erlingsson dæmdi úrslitaleik í U16kv af mikilli röggsemi. Einar Þ. Skarphéðinsson dæmdi svo bronsleik.

Það er orð manna hér í Svíþjóð að Íslendingar eiga bestu dómarana á mótinu. Það sýndi sig líka að dag að þrir af fjórum dæmdu úrslitaleiki og sá fjórði fékk leik um þriðja sæti, en þess ber að geta að ekki fengu allir dómararnir sem hingað komu verkefni í dag. Þetta var því mikil viðurkenning á störfum okkar dómara.