Íslensku 18 ára liðin unnu bæði sigur á Svíum á fyrsta degi Norðurlandamóts unglinga sem hófst í Svíþjóð í kvöld. Liðin létu ekki ferðaþreytu hafa áhrif á sig heldur gáfu tóninn fyrir mótið en liðin urðu bæði Norðurlandameistarar eftir sigur á Svíum þegar þessi árgangar léku saman í 16 ára liðunum fyrir tveimur árum. Strákarnir unnu sinn leik 86-84 en sigur stelpnanna var aðeins stærri, 71-64. Þriðja liðið til þess að hefja leik í dag, 16 ára lið kvenna tapaði hinsvegar sínum fyrsta leik, 43-59, fyrir Dönum.

Hörður Axel Vlhjálmssson skoraði 35 stig í 86-84 sigri 18 ára liðs karla á Svíum og tróð meðal annars boltanum tvisvar sinnum í körfuna með miklum tilþrifum. Liðið byrjaði ekki vel gegn Svíum, lenti strax undir 10-0 og Svíar voru yfir 27-15 eftir fyrsta leikhlutann. Í stöðunni 40-26 fyrir Svía tóku þeir Brynjar Þór Björnsson og Hörður Axel Vilhjálmsson sig til og skoruðu saman 17 íslensk stig í röð, Brynjar 9 og Hörður 8, og komu íslenska liðinu yfir 43-40 fyrir hálfleik. Íslensku strákarnir voru 14 stigum yfir, 75-61, eftir þriðja leikhlutann en Svíar skoruðu 8 stig í röð á lokakaflanum en strákarnir lönduðu sigrinum eftir æsispennandi lokamínútur.

Ísland-Svíþjóð 86-84 (15-27, 43-40, 75-61)
Stig Íslands: Hörður Axel Vilhjálmsson 35, Brynjar Þór Björnsson 14, Hjörtur Hrafn Einarsson 14, Sigurður Gunnar Þorsteinsson 10, Þröstur Jóhannsson 8, Hörður Hreiðarsson 2, Þórir Guðmundsson 2, Rúnar Ingi Erlingsson 1.

18 ára lið kvenna náði mest 20 stiga forskot í 71-64 sigri á Svíum, var með 15 stiga forskot í hálfleik, 46-31 en missti muninn niður í fjögur stig í fjórða leikhluta. Íslensku stelpurnar voru þó ekkert á því að gefa frá sér sigurinn og sýndu mikinn styrk með því að landa sigrinum í lokin.
Íslenska liðið lék frábærlega í fyrri hálfleik og þá áttu Svíar fá svör við leik íslensku stelpnanna sem settu meðal annars niður sjö þriggja stiga körfur í hálfleiknum og unnu fráköstin 26-15.
Helena Sverrisdóttir skoraði 30 stig þar af helminginn fyrir utan þriggja stiga linuna auk þess að taka 10 fráköst, gefa 5 stoðsendingar og stela 5 boltum. María Ben Erlingsdóttir var næststigahæst með 18 stig, Bryndís Guðmundsdóttir var með 12 stig og 5 stoðsendingar og Ingibjörg Elva Vilbergsdóttir skoraði 7 stig og stal 5 boltum. Margrét Kara Sturludóttir tók 13 fráköst í leiknum þar af 12 þeirra í fyrri hálfleik. Þetta var fyrsti sigur 18 ára liðs kvenna á Svíum á Norðurlandamótinu en liðið hafði tapað öllum fjórum leikjum sínum gegn gestgjöfunum frá 2003 til 2005.

<Ísland-Svíþjóð 71-64 (19-12, 46-31, 63-51)
Stig Íslands: Helena Sverrisdóttir 30, María Ben Erlingsdóttir 18, Bryndís Guðmundsdóttir 12, Ingibjörg Elva Vilbergsdóttir 7, Sigrún Ámundadóttir 3, Margrét Kara Sturludóttir 1.

16 ára lið kvenna tapaði sínum fyrsta leik fyrir Dönum, 43-59, þar sem slæm byrjun átti mikinn þátt í að íslenska liðið missti þær dönsku of langt fram úr sér. Danska liðið vann 1. leikhlutann 20-4 en góður annar leikhluti islenska liðsins kom muninum niður í níu stig, 20-29, fyrir hálfleik og í lok þriðja leikhlutans munaði aðeins fimm stigum (33-38) á liðunum. Danska liðið var síðan sterkara á lokasprettinum og vann 16 stiga sigur.

Ísland-Danmörk 43-59 (4-20, 20-29, 33-42)
Stig Íslands: Klara Guðmundsdóttir 7, Ragna Margrét Brynjarsdóttir 6 (4 fráköst, 4 varin skot), Hafrún Hálfdánardóttir 6, Gunnhildur Gunnarsdóttir 6, Ingibjörg Jakobsdóttir 5, Lilja Ósk Sigmarsdóttir 4, Guðný Gígja Skjaldardóttir 4, Alma Rut Garðarsdóttir 3 (5 fráköst, 3 stoðsendingar), Kristín Fjóla Reynisdóttir 2.