Ólafur Rafnsson, fyrrum formaður KKÍ, var kjörinn forseti ÍSÍ á íþróttaþingi nú rétt áðan. Ólafur hlaut 120 atkvæði, en Sigríður Jónsdóttir hlaut 113 atkvæði.

"Fyrir hönd körfuknattleikshreyfingarinnar óska ég Ólafi Rafnssyni formanni okkar sl. 10 ár og fjölskyldu hans innilega til hamingju með kjörið til forseta ÍSÍ. Þetta er æðsta embætti sem einstaklingur getur gegnt í íþróttalífinu hér á Íslandi og í fyrsta sinn í sögunni sem einstaklingur úr körfuknattleiknum gegnir þessu embætti".

"Ég hef starfað mikið með Ólafi síðan 1999 þegar ég settist í stjórn KKÍ og er búinn að vera varaformaður hans mest allan þann tíma. Ég tel mig því þekkja vinnubrögð hans vel og veit að það sem Ólafur tekur sér fyrir hendur er unnið af kostgæfni, vandvirkni og heilindum. Ég get því með sanni sagt að íþróttahreyfingin er í öruggum höndum með Ólaf sem forseta og tel ég það mikla gæfu fyrir hreyfinguna að Ólafur skyldi veljast til að leiða hana".

"Ég vil einnig nota þetta þessan pistil til þess að þakka Ellert B. Schram fráfarandi forseta ÍSÍ fyrir það mikla starf sem hann hefur innt af hendi fyrir íþróttahreyfinguna. Vonandi fáum við að njóta krafta hans sem lengst með einhverju móti í komandi framtíð".

Hannes Sigurbjörn Jónsson
Formaður KKÍ