Aganefnd KKÍ hefur dæmt Halldór Karlsson leikmann UMFN í tveggja leikja bann í kjölfar brottrestrarvillu sem hann hlaut í leik Keflavíkur og Njarðvíkur á fimmtudaginn í síðustu viku. Halldór missir því af leikjunum við ÍR í úrslitakeppninni, en gæti leikið í oddaleik ef af honum verður.

Halldór var kærður til aganefndar fyrir óhæfileg mótmæli við dómara í kappleik, en fyrir vikið fékk hann brottrekstrarvillu eins og fyrr er getið. Þess má geta að þetta er í annað sinn á yfirstandandi keppnistímabili sem Halldór er kærður til aganefndar og hlýtur leikbann og þess vegna er bannið tveir leikir í þetta sinn í samræmi við reglur aganefndar.