Lokaumferð 1. deildar karla fer fram um næstu helgi. Tindastóll hefur þegar tryggt sér sigur í deildinni og þar með sæti í Iceland Express-deildinni að ári. Ljóst er að FSu, Valur, Þór Þ. og Breiðablik munu leika um hitt sætið. Hvernig liðin raðast í 2.-5. sæti og hvaða lið munu mætast í undanúrslitum mun skýrast í lokaumferðinni.

Reynir S. er fallið í 2. deild, en hvort KFÍ eða ÍS fylgir þeim kemur einnig í ljós um helgina. Eftirfarandi eru vangaveltur fyrir lokaumferð 1. deildar karla. Í henni mætast Þór Þ - FSu á föstudag, Breiðablik - Stjarnan og Drangur - Reynir S. og KFÍ - Tindastóll. Á sunnudag mætast síðan Valur og ÍS.

Ef FSu, Valur og Breiðablik vinna öll leiki sína í síðustu umferð þá endar Valur í 2. sæti í deildinni og mætir Þór Þ. sem endar í 5. sæti.
Það er svo spurning hvernig leikur FSu og Þórs færi, ef FSu myndi vinna með 3 stigum eða minna þá er Breiðablik númer 3 í deildinni og fær heimavallarréttinn gegn FSu, annars er það öfugt.

Ef Þór og Valur eru jöfn þá endar Þór ofar.
Ef Þór og FSu eru jöfn þá er FSu ofar.
Ef Þór og Breiðablik eru jöfn þá er Breiðablik ofar.
Ef Þór, Valur og FSu eru jöfn þá eru hlutirnir háðir því hversu stórt FSu vinnur Þór.

Ef FSu vinnur með 1 eða 2 þá er Þór efstur, Valur í 2. og FSu í þriðja. Ef FSu vinnur með 3 þá er Valur efstur, Þór í 2. sæti og FSu í þriðja. Ef FSu vinnur með 4 eða 5 þá er Valur efstur, FSu í 2. og Þór í þriðja. Ef FSu vinnur með 6 stigum eða meira þá er FSu efst, Valur í öðru og Þór í þriðja.

Ef Þór, Breiðablik og FSu eru jöfn þá eru hlutirnir enn háðir því hversu stórt FSu vinnur Þór. Ef FSu vinnur með 1 til 5 stigum þá er Breiðablik efst, FSu í öðru og Þór í þriðja. Ef FSu vinnur með 6 eða meira þá er FSu efst, Breiðablik í öðru og Þór í þriðja.

Þór, Valur og Breiðablik geta ekki orðið jöfn öll þrjú án þess að FSu sé með í pakkanum og það hefur verið útskýrt áður.

Ef Valur, FSu og Breiðablik verða jöfn þá verður Valur efstur, Breiðablik í öðru og FSu í því þriðja.

Varðandi botninn þá er það allavega á hreinu að það getur aldrei gerst að öll liðin verði jöfn þar ef liðin í 2. - 5. sæti eru jöfn, Valur og ÍS geta ekki bæði unnið.
En ef KFÍ og ÍS vinna og Drangur tapar þá verður KFÍ númer 7, Drangur númer 8 og ÍS fellur. Eini möguleiki ÍS er að KFÍ tapi og ÍS vinni.

Úrslitakeppnin mun væntanlega hefjast föstudaginn 24. mars.