Hannes Sigurbjörn Jónsson varaformaður KKÍ hefur ákveðið að gefa kost á sér til formanns KKÍ á komandi ársþingi sambandsins sem haldið verður í Grafarvogi 6.-7. maí nk.

Hannes sendi frá eftirfarandi tilkynningu í morgun:

Eins og flestum er kunnugt mun Ólafur Rafnsson formaður KKÍ ekki gefa kost á sér til endurkjörs í vor á ársþingi KKÍ. Ólafur hefur stýrt sambandinu af öryggi og festu síðustu 10 árin og hefur mikil framþróum orðið í íslenskum körfuknattleik undir hans stjórn.

Í ljósi þessa hef ég ákveðið að gefa kost á mér til formanns KKÍ næstu tvö árin á komandi ársþingi sambandsins í vor.

Ég hef setið í nefndum KKÍ frá 1996, setið í stjórn KKÍ frá 1999 og verið varaformaður sambandsins síðustu 6 árin. Ég hef því umtalsverða reynslu og þekkingu á störfum KKÍ innanlands sem utan sem ég veit að mun nýtast til góðra verka

Auk fyrrtalinnar reynslu hef ég mikinn metnað fyrir hönd körfuknattleikshreyfingarinnar og ég veit að með þetta tvennt að vopni get ég stýrt hreyfingunni af öryggi og sanngirni. Ég mun leggja mig allan fram um að efla körfuknattleik á Íslandi enn frekar á næstum árum verði ég kosinn formaður sambandsins á komandi ársþingi.

Ef þið hafið einhverjar spurningar til mín þá endilega hafið samband við mig.

Körfuboltakveðja
Hannes Sigurbjörn Jónsson
s.898-5857
begghann@simnet.is