Haukar tryggðu sér deildarmeistaratitilinn í Iceland Express deild kvenna með 21 stigs sigri á Grindavík, 89-68, í gær. Þetta var 15. deildarsigur liðsins í röð og eftir hann eru Haukar með 8 stiga forskot og betri innbyrðisstöðu á Grindavík sem getur aðeins náð liðinu að stigum. Þjálfari Haukaliðsins er Ágúst Björgvinsson og er þetta þriðji titilinn sem liðið vinnur undir hans stjórn en liðið varð bikarmeistari í fyrra og Powerade-meistari fyrr á þessu tímabili.

Haukar eru aðeins fjórða félagið til að verða deildarmeistari í 1. deild kvenna síðan að úrslitakeppnin var tekin upp árið 1993. Keflavík hafði unnið þennan titil síðustu þrjú ár og níu sinnum alls, KR vann hann þrjú ár í röð frá 1999 til 2001 og ÍS vann í eina skiptið árið 2002.

Helena Sverrisdóttir var með þrefalda tvennu í liði Hauka (27 stig, 12 fráköst og 10 stoðsendingar) auk þess að stela 6 boltum en 22 af stigum hennar komu í fyrri hálfleiknum. Megan Mahoney var með 27 stig, 17 fráköst og 6 stolna bolta og þá eru ótalin framlög Kristrúnar Sigurjónsdóttur (13 stig, 10 fráköst, 8 í sókn) og Pálínu Gunnlaugsdóttur (12 stig, 8 fráköst, 4 stoðsendingar).

Ekkert lið í 1. deild kvenna hefur orðið deildarmeistari fyrr síðan að núverandi fyrirkomulag var tekið þar sem sex lið spila fjórfalda umferð. Haukaliðið bætti met Keflavíkur frá 2003 um fimm daga. Þessi tvö deildarmeistaralið eru líka þau einu sem hafa unnið deildina þegar þau eiga enn fjóra leiki eftir óspilaða.

Deildarmeistaratitlar í 1. deild kvenna 1993-2006:
2006 Haukar (1)
2005 Keflavík (9)
2004 Keflavík (8)
2003 Keflavík (7)
2002 ÍS (1)
2001 KR (3)
2000 KR (2)
1999 KR (1)
1998 Keflavík (6)
1997 Keflavík (5)
1996 Keflavík (4)
1995 Keflavík (3)
1994 Keflavík (2)
1993 Keflavík (1)

Flestir deildarmeistaratitlar í 1. deild kvenna 1993-2006:
9 - Keflavík (1993-98, 2003, 2004, 2005)
3 - KR (1999, 2000, 2001)
1 - ÍS (2002)
1 - Haukar (2006)

Fljótastar til að verða deildarmeistarar í 1. deild kvenna 1993-2005:
Eftir dagsetningu:
19. janúar 1993 - Keflavík (sigur á Grindavík á útivelli)
8. febrúar 2006 - Haukar (sigur á Grindavík á útivelli)
13. febrúar 2003 - Keflavík (sigur á Grindavík á útivelli)
20. febrúar 1999 - KR ( sigur á Grindavík á útivelli)
21. febrúar 2004 - Keflavík (sigur á KR á heimavelli)
23. febrúar 2005 - Keflavík (sigur á ÍS á heimavelli)
26. febrúar 1997 - Keflavík (sigur á KR á útivelli)
28. febrúar 1996 - Keflavík (sigur á Breiðabliki á heimavelli)
Eftir flestum leikjum sem liðið á eftir:
4 - Keflavík 2003
4 - Haukar 2006
3 - Keflavík 1993
3 - KR 1999
2 - Keflavík 1997
2 - Keflavík 2004
2 - Keflavík 2005