Ólafur Rafnsson formaður KKÍ skrifar í formannspistli sínum í dag um borgina Harbin í Kína og ferð íslenska landsliðsins þangað í ágúst sl. en borgin hefur verið talsvert í fréttum að undanförnu. Nánar í Lesningunni.

Borgin Harbin í Heilóngjiang héraði í norðausturhorni Kínaveldis hefur talsvert verið í fréttum undanfarið vegna alvarlegrar bensólmengunar í ánni Songhua sem rennur í gegnum borgina. Harbin er falleg og snyrtileg rúmlega þriggja milljóna íbúa borg, rík af glæsilegum byggingum með rússneskum áhrifum, og fræg meðal annars fyrir árleg hátíðahöld þar sem listamenn víða að úr Kína keppast um að búa til stórfenglega ísskúlptúra – en frosthörkur geta verið þar miklar að vetri til.