KKÍ og Vífilfell hafa gert með sér þess efnis að Powerade íþróttadrykkja framleiðandinn verður styrktaraðili fyrirtækjabikarsins. Samningurinn tekur gildi þegar í stað og er til þriggja ára. KKÍ þakkar Hópbílum fyrir samstarfið undanfarin ár.

Þrír leikir sem áttu að vera í Powerade-bikar karla á fimmtudaginn hafa verið færðir yfir á föstudag 4. nóvember. Þetta eru leikir KR – Snæfell, UMFN – ÍR og Skallagrímur – Fjölnir.

Átta liða úrslitum keppninnar verður framhaldið á sunnudaginn 6. nóvember, en þeim lýkur með leik Keflavíkur og UMFG þriðjudaginn 8. nóvember. Undanúrslit Powerade-bikarsins verða síðan í Laugardalshöll 18. nóvember. Úrslitaleikurinn verður daginn eftir 19. nóvember á sama stað, samhliða undanúrslitum kvenna. Úrslitaleikur kvenna verður laugardaginn 26. nóvember. Keflavík og Haukar eru komin í undanúrslit Powerade bikars kvenna.

Sjónvarpið mun sýna beint frá Laugardalshöll 19. nóvember. Fyrst annan undanúrslitaleik kvenna kl. 14:15 og síðan úrslitaleik karla kl. 16:10. Úrslitaleikur kvenna viku síðar verður einnig sýndur beint í sjónvarpinu.