Njarðvíkingum er spáð efsta sætinu í Iceland Express-deild karla og Keflavíkingum efsta sætinu í Iceland Express-deild kvenna. Þetta var niðurstaðan í spá forsvarsmenn, þjálfara og fyrirliða félaganna, en spáin var kynnt á blaðamannafundi í dag.

Njarðvík hlaut 408 stig í spánni,en Íslandsmeisturum Keflavíkur var spáð öðru sæti, þeir hlutu 389 stig. Næstir þar á eftir komu Grindvíkingar með 365 stig, KR-ingar með 325 stig, Skallagrím var spá fimmta sætinu, en þeir hlutu 237 stig. Fjölnir hlaut 210 stig í sjötta sæti og grannar þeirra úr ÍR urðu í sjöunda sæti með 199 stig. Í áttunda sæti lentu Þórsarar frá Akureyri með 197 stig og Haukum var spáð níunda sætinu með 183 stig. Í tíunda sæti í spánni varð Snæfell með 143 stig, en Hamri/Selfossi og Hetti frá Egilsstöðum er spáð falli úr Iceland Express-deildinni. H/S hlaut 100, en Höttur 46 stig.

Íslandsmeisturum Keflvíkur er sem fyrr spáð sigri í Iceland Express-deild kvenna. Keflavík hlaut 102 stig, en í næsta sæti lentu Grindavíkurkonur með 84 stig. Haukum er spáð þriðja sætinu, Haukar hlutu 70 stig. ÍS er spáð fjórða sæti, en Stúdentar fengu 60 stig. Nýliðum Breiðabliks er spáð fimmta sætinu, en Blikar fengu 35 stig. KR er spáð falli úr deildinni, KR fékk 27 stig. KR tók sem kunnugt er sæti Njarðvíkur þegar liðið var dregið úr keppni. KR féll úr deildinni á síðasta keppnistímabili.