Sunnudaginn 9. október fer meistarakeppni KKÍ fram í ellefta sinn. Að þessu sinni verður leikið í Keflavík, heimavelli Íslandsmeistara karla og kvenna.

Í kvennaflokki mætast Íslands- og bikarmeistarar Keflavíkur og bikarmeistarar Hauka. Leikurinn hefst kl. 17:00. Fastlega má búast við að þessi tvö félög berjist um Íslandsmeistaratitilinn í vetur og því verður fróðlegt að fylgjast með þessari fyrstu rimmu þeirra af mörgum í vetur.

Leikinn dæma þeir Rögnvaldur Hreiðarsson, Erlingur Snær Erlingsson og Eggert Aðalsteinsson.

Karlaleikurinn er viðureign Íslandsmeistara Keflavíkur og bikarmeistara Njarðvíkur. Leikurinn hefst kl. 19:15.

Leikinn dæma þeir Sigmundur Már Herbertsson, Kristinn Óskarsson og Björgvin Rúnarsson.

Frá upphafi keppninnar hefur KKÍ styrk ýmis málefni og leikirnir hafa því verið ágóðaleikir. Að þessi sinni er það Foreldrafélag barna með axlarklemmu sem fær allan ágóða af leikjunum.