Evrópukeppni landsliða, sem lauk í Serbíu á sunnudaginn, vakti gríðarlega athygli, ekki bara í Evrópu heldur um allan heim. Um 850 blaðamenn frá 50 löndum voru í Belgrad til að flytja heimsbyggðinni fréttir af mótinu.

Körfuboltaæði rann á grísku þjóðinu á meðan landslið þeirra komst yfir hverja hindrunina á fætur annarri á leið sinni að fyrsta Evrópumeistaratitilinum síðan 1989. Leikur Grikkja og Rússa í 8-liða úrslitum fékk 35% sjónvarpsáhorf á ERT-stöðinni í Grikklandi á fimmtudaginn, sem var mesta áhorf sem nokkur sjónvarpsstöð fékk þar í landi.

Gott áhorf var einnig á leiki keppninnar í Þýskalandi, Litháen, Króatíu og Rússlandi. Þar að auki voru beinar útsendingar frá keppninni í Bandaríkjunum, Filipseyjum, Kína, Tævan, í mið-austur löndum og í norður Afríku. Leikirnir sl. föstudag voru sýndir í 80 löndum og úrslitaleikurinn í 120 löndum.

Það má því búast við því að á annan milljarð manna hafi séð úrslitaleik Grikkja og Þjóðverja á sunnudaginn. Til gamans má geta þess að talið er að um 600 milljónir manna hafi séð beina útsendingu kínverska sjónvarpsins frá síðari landsleik Kína og Íslands 30. ágúst sl.

Þessu til viðbótar hafa örugglega margir nýtt sér þá þjónustu FIBA og FIBA Europe að horfa á leikina á internetinu. Það var t.d. eina leiðin fyrir íslenska körfuknattleiksáhugamenn að sjá leiki keppninnar.

Heimsóknir á vef keppninnar voru líka margar. Alls voru skráðar heimsóknir á vefinn um 1,2 milljónir frá því að keppnin hófst þann 16. september.

Miðasala á keppnina gekk mjög vel. Uppselt var á alla leiki í riðlakeppninni og erfitt var að fá miða á útsláttarleikina í Belgrad. Þegar í júlí voru allir miðar á úrslitaleikinn uppseldir. Þúsundir áhorfenda frá nágrannaríkjum Serbíu, Slóveníu og Grikklandi, mættu til Belgrad um helgina til að fylgjast með undanúrslitum og úrslitum keppninnar.