Íslenska karlalandsliðið leikur fyrri vináttuleik sinn gegn Hollandi í glæsilegri íþróttahöll, Martini Plaza, í Groningen í dag kl. 18.00 að íslenskum tíma.
Strákarnir eru vel stemmdir og ætla að taka vel á Hollendingum í leiknum. Hollenska liðið, sem er að undirbúa sig fyrir riðlakeppni um laust sæti á EUROBASKET 2005 í Belgrad í september, er með sitt sterkasta lið, fyrir utan að Dan Gadzuric, sem var að endurnýja samning hjá Milwaukee Bucks er ekki kominn til móts við hópinn.

Sigurður Ingimundarson, landsliðsþjálfari er hóflega bjartsýnn fyrir leikina gegn Hollandi: "Við munum leika ákveðið gegn Hollandi sem hefur á að skipa jöfnu og hávöxnu liði. Gengi liðsins í undanförnum leikjum, nú síðast í æfingamóti í Portugal, hefur verið upp og ofan en nú fyrst geta þeir telft fram sterkasta hópnum sínum. Strákarnir eru tilbúnir í leikinn og eins og í öðrum leikjum leikum við til sigurs"

Leikirnir gegn Hollandi eru liður í undirbúningi landsliðsins fyrir leikina gegn Dönum (3. september) og Rúmeníu (10. september) í Evrópukeppninni, en sigur í þeim leikjum tryggir íslenska liðinu leiki um sæti í A-deild Evrópu.

Björgvin Rúnarsson, FIBA dómari mun dæma báða leikina með hollenskum kollegum sínum.

Við verðum með fréttir af leiknum í kvöld að leik loknum, en reynum að skjóta inn tölum eftir hvern fjórðung.

Íslenski hópurinn biður að heilsa heim.