Stelpurnar töpuðu fyrir Lettum í gær 101-60. Óhætt er að segja að Lettar hafi hitt óeðlilega vel en bæði lið áttu sinn besta sóknardag í mótinu fram að því.
Í fyrsta skipti í mótinu náðu stelpurnar okkar að skora 60 stig auk þess sem liðið tók 16 fleiri fráköst en Lettar. Atkvæðamestar hjá íslenska liðinu voru þær Unnur Tara og Kara með 12 stig hvor og Ingibjörg sem skoraði 9 stig.
Í dag, fimmtudag, kepptu stelpurnar við lið Bosníu og Hersegóvínu. Ísland var betri aðilinn á flestum sviðum í leiknum en grátlega léleg skotnýting varð okkar stelpum að falli. Íslenska liðið mætti harðákveðið í leikinn og áttu andstæðingarnir í mestu vandræðum með baráttuglaðar stelpurnar allan leikinn. En eins og áður segir töpuðu okkar stelpur á skelfilegri skotnýtingu og skiljanlega er erfitt að vinna leiki þegar svo er. Lokatölur 66-50. Atkvæðamestar voru Kara með 12 stig og 12 fráköst og Unnur Tara með 11 stig. Næsti leikur er við Portúgal á laugardaginn.