Síðasti leikur Íslands í riðlakeppninni fór fram í dag. Leikið var gegn Finnum sem eru búnir að vera óstöðugir í gegnum keppnina. Fyrir leikinn var ljóst að Finnar yrðu í 4. sæti riðilsins en Ísland á botninum í 6. sæti og því ljóst að leikurinn skipti litlu máli að því leitinu til.

Finnar hófu leikinn af krafti meðan íslensku strákarnir voru ekki alveg á tánum, hvorki í vörn né sókn. Staðan 26-11 eftir fyrsta leikhluta. Í öðrum leikhluta juku strákarnir baráttuna og spiluðu mun betur og náðu að halda jöfnu við Finnana. Leikhlutinn endaði 19-18 og því staðan 47-29 Finnum í vil í hálfleik. Allir leikmenn liðsins komu við sögu í fyrri hálfleiknum, og var spilatíminn að dreifast nokkuð jafnt á leikmennina 10.

Líkt og í fyrri hálfleiknum byrjuðu þeir finnsku af krafti og voru að spila ansi vel, hittu vel úr skotunum og voru sterkir í vörninni. Töluverður styrkleikamunur er á liðunum, Finnarnir eru mjög líkamlega sterkir og spila mjög skipulagðan og skemmtilegan bolta. Þeir hafa á að skipa mjög skemmtilegum leikstjórnanda sem skapaði mikið fyrir aðra leikmenn liðsins og þá sérstaklega eina skyttuna þeirra sem virtist ekki klikka úr skoti. Leikhlutinn endaði 30-14 Finnum í vil.

Áfram héldu Finnarnir að leika íslenska liðið grátt, sem þó reyndu sitt besta. Leikmennirnir af bekknum fengu mikið að spila og ljóst að strákarnir voru farnir að hugsa um leikinn gegn Portúgal á föstudaginn. Viðar Örn Hafsteinsson var þó ekki alveg á því að tapa alltof stórt og barðist vel allan tímann. Undir lok leiksins tók hann nærri uppá sitt einsdæmi sóknarleik íslenska liðsins og skoraði 9 stig á 40 sekúndum og lagaði þannig lokastöðu leiksins. Úrslitin 104-65.

Eins og áður sagði var leikurinn daufur og leikmenn liðsins kannski ekki eins einbeittir og þeir geta. Leikmenn liðsins voru að spila allir mjög svipað, þar var þó Viðar Örn sem stóð uppúr. Nú er frídagur á morgun, og síðan leikur gegn Portúgal á föstudaginn í umspili um sæti 9 til 12. Hér er annars búið að vera ansi grátt í dag, hellidemba í morgun og spáin svipuð fyrir morgundaginn. En það, er ekki hægt annað en að reyna að gera sem best úr þessari ferð þó að úrslitin láti heldur betur á sér standa, en bæði strákarnir (sem eru flestir að spila sína fyrstu landsleiki) og þjálfararnir (sem einnig eru að þjálfa sína fyrstu landsleiki) eru að fá dýrmæta reynslu, bæði í fræðum körfuboltans sem og lifnaðarháttum hér í austur-evrópu.

Strákarnir skila kveðju heim til allra og þá sérstaklega U-18 ára liðsins sem fara senn að hefja leik í Evrópumótinu í Slóvakíu. Megi þeir sýna þessum Evrópuköllum hvað virkilega býr í Íslendingum.