"Fáránleg barátta" Íslendinganna í fyrri hálfleik gegn Pólverjum í gærkvöldi vakti mikla athygli þeirra sem með fylgdust. Fulltrúar nokkurra annarra liða komu að máli við Bojan Desnica, þjálfara Íslands, eftir leikinn og lýstu aðdáun sinni á framgöngu íslensku strákanna. En þessi barátta hafði nokkrar afleiðingar, sem vonandi eru þó ekki alvarlegar.

Í öðrum leikhluta fleygðu bæði Bjarni og Sveinbjörn (hér eftir Svenni) sér fram fyrir einn Pólverjann til að bjarga boltanum fra því að fara útaf. Bjarni sigldi hraðbyri á maganum í gegndrepa búningnum, med höfuðið á undan og fætur uppi eins og segl, útaf vellinum og strandaði hálfur undir varamannabekk Pólverjanna. Honum varð ekki meint af, enda frægur harðnagli og hlotið marga byltuna við tamningar baldinna tryppa. Svenni skautaði undir Pólverjann sem missti fótanna og lenti illa ofan á bakinu á Svenna sem fékk mikið högg. Pólski sjúkraþjálfarinn kom strax með kælisprey og "frysti" bakið. Stuttu seinna lenti Ragnar í harkalegri hindrun og sneri sig á ökkla. Hann hoppaði um allan völl á "einari" en herti svo bara skóþvenginn. Ekki þarf að taka það fram að allir þrír héldu áfram leik og vakti þetta aðdáun áhorfenda sem klöppuðu þeim lof í lofa.