Það má með sanni segja að enn ein rósin hafi bæst í hnappagat Brynjars Þórs Björnssonar nú á dögunum, en þá var honum boðið að taka þátt í æfingabúðum Adidas í Berlín dagana 17.-21. ágúst. Adidas stendur fyrir slíkum búðum á fjórum stöðum í heiminum og er Brynjari boðið í Evrópuhlutann ásamt öðrum efnilegum leikmönnum í Evrópu. Í búðunum munu starfa hópur góðra þjálfara úr Evrópu auk þess sem NBA leikmenn munu heimsækja búðirnar og tala um hvað þurfi til, til að ná árangri og komast meðal þeirra bestu.
Næsta sumar verður svo bestu leikmönnum úr hverjum hinna fjögurra búða boðið í æfingabúðir í Atlanta í Bandaríkjunum.

Það verður því nóg að gera hjá Brynjari í sumar en 15.-24 júlí verður hann í Slóvakíu með U18 ára liði Íslands í Evrópukeppni. 28.-31. júlí verður hann í Trevisio á Ítalíu í æfingabúðum á vegum FIBA og NBA og svo þessar Adidasbúðir.