Fundur Norðurlandanna með Nar Zanolin framkvæmdastjóra FIBA Europe hér á landi um helgina var mjög gagnlegur fyrir báða aðila. Á fundinum kynntu Norðurlöndin starfið sem þau eru að vinna í löndunum fimm og hvernig efla og bæta mætti samstarfið við FIBA Europe.

Norðurlöndin eiga það sameiginleg að þurfa að þurfa að reiða sig mjög á styrktarsamninga til að fjármagna starfið og opinberar fjárveitingar eru í lágmarki. Nar Zanolin vildi í lok fundarins koma því á framfæri við stjórnvöld að auka fjárveitingar til íþróttastarfs. Ekki bara til þeirra sem þegar eru orðnir afreksmenn, heldur einnig til sársambandanna svo þau geti búið til afreksmenn.

Þá sagðist Zanolin vilja sjá Norðurlöndin halda Evrópukeppni yngri landsliða, en löndin hafa ekki haldið slíkt mót í nokkurn tíma.

Fulltrúar allra landanna fimm sem og Nar Zanolin lýstu yfir ánægju með fundinn og talað var um að halda annan slíkan fund í náinni framtíð.

Í gær héldu hinir erlendu gestir flestir af landi brott eftir viðburðaríka og vonandi ánægjulega helgi.