Nar Zanolin, framkvæmdastjóri FIBA-Europe - körfuknattleikssambands Evrópu, er væntanlegur í heimsókn til Íslands um aðra helgi. Samhliða heimsókninni verður haldinn sérstakur fundur Norðurlandaþjóðanna með honum.

Það verður seint á fimmtudagskvöld 23. júní sem Zanolin kemur til landsins, en á föstudag er ráðgerð skoðunarferð um suðurland. Fundurinn með Norðurlandaþjóðunum verður síðan fyrir hádegi á laugardag 25. júní. Síðdegis verður síðan móttaka fyrir hina erlendu gesti og boðsgesti KKÍ.

Á fundinum verða rædd sameiginleg mál Norðurlanda gagnvart FIBA-Europe og öfugt. Þetta verður í fyrsta sinn sem framkvæmdastjóri FIBA sækir Ísland heim og mikill heiður sem Íslandi er sýndur með heimsókn hans og ekki síður að fundur hans með hinum norrænu þjóðum skuli vera haldinn hér á landi.


mt: Nar Zanolin framkvæmdastjóri FIBA-Europe og frú ásamt Ólafi Rafnssyni formanni KKÍ.