Strákarnir í 18 ára landsliðinu gáfu tóninn á fyrsta degi Norðurlandamóts unglinga í gær með glæsilegum sigri á Svíum, 79-77, eftir að hafa mest náð tólf stiga forskoti í fjórða leikhlutanum. Ingi Þór Steinþórsson, þjálfari liðsins var kátur með þessa góðu byrjun á mótinu.

"Við átum þá í fráköstunum, unnum þá þar 48-33 og þar sýndu strákarnir baráttu og viljastyrk þrátt fyrir að vera miklu minni og nýkomnir úr flugi. Strákarnir voru einnig grimmir við að keyra upp að körfu og við fengum sem dæmi tíu fleiri víti," sagði Ingi Þór sem var að beita margskonar varnaraðbrigðum í leiknum og virtist það oft slá Svíanna út af laginu. "Eins og ég var ánægður með að við náðum upp 12 stiga forskoti í fjórða leikhluta var ég óánægður með hvað mínir menn urðu staðir og hleyptu Svíum inn í leikinn," sagði Ingi en Svíar skoruðu 13 stig gegn 3 á lokamínútunum og áttu möguleika á að jafna leikinn.

Brynjar Þór Björnsson náði þrefaldri tvennu í leiknum, skoraði 21 stig, tók 10 fráköst og gaf 10 stoðsendingar. Brynjar var eins og oft áður sterkur á lokamínútunum og var sem dæmi með 8 stig og 3 stoðsendingar í fjórða leikhlutanum.
Brynjar var að gera góða hluti fyrir liðið en það skipti líka miklu máli að menn eins og Sigurður Gunnar Þorsteinssson (14 stig, 9 fráköst og 4 stoðsendingar) og Ólafur Torfason (13 stig, 5 frákost) voru að hjálpa liðinu mikið í baráttnni undir körfunni. Þá má ekki gleyma Darra Hilmarssyni, nýstignum upp úr axlarmeiðslum, en Darri batt saman vörnina og skoraði tvær stórar þriggja stiga körfur á góðum tíma.

"Við urðum fyrir smá áfalli í lokin þegar Ólafur Torfason fékk högg á hnéið og bólgnaði upp en við vitum meira um meiðsli hans seinna í dag," sagði Ingi Þór en íslenska 18 ára landslið karla mætir því norska í dag. "Þetta gefur okkur sjálfstraust, leikmenn eru enn að læra inn á hvern annan. Það er bara krafa mín núna að leikmenn haldi áfram að bæta sig og sýna samvinnu því þrátt fyrir þennan sigur þá erum við langt frá því að vera mettir," sagði Ingi Þór að lokum.